Nunaminerals nalikillileerujussuarnermigut ilungersunartorsiorluinnalersoq
Immikkut ittumik nalikilliliineq 82 millionit koruuninik naleqarpoq.
Siulersuisut taamaalillutik ingerlatseqatigiiffiup 2014-imut 85 millionit koruuninik amigartooruteqarnissaa namminerlu aningaasaatit 10 millionit koruuninik amigartooruteqarfiunissaat naatsorsuutigaat, ingerlatseqatigiiffik fondsbørsimut nalunaaruteqarluni taama allappoq.
NunaMinerals ilungersunarluinnartumik inissisimavoq ingerlatsinerullu ingerlaannarnissaanut aammalu aatsitassanik ujarlernissamut aningaasanik naammattunik maannakkorpiaq tigoriaannaateqarani.
- Ingerlatseqatigiiffimmi aqutsisut ukiuni marlussunni kingullerni ingerlatseqatigiiffiup annerusumik aningaasalersorneqarnissaa sulissutigisimagaluarpaat, tamannali ajoraluartumik iluatsinneqarsinnaasimanngilaq. Aammaattaaq ingerlatseqatigiiffiup immikkut ittumik ingerlatsinerata aningaasalersornissaa ingerlatseqatigiiffimmut ajornakusoortuusimavoq, fondsbørsimut nalunaarummi tamanna atuarneqarsinnaavoq.
Aatsitassanik ujarlernermut aningaasartuutit ukiup sisamararterutaani nalunaarummi kingullermi septembarip 30-iani 2014-imeersumi 79 millionit koruunit sinnilaarpaat. Taakkuuppullu maanna 0 koruuninut nalikilliliivigineqartut.
Namminersorlutik Oqartussat ingerlatseqatigiiffimmut taarsigassarsiaritinneqartunut kingullernut 4,5 millionit koruuniusunut atatillugu, piumasaqaatissatut siunnersuutigineqartut ilaatigut saqqummiunneqarnissaat siunertaralugu, immikkut ittumik ataatsimeersuarnissamut piaartumik aggersaasoqarnissaa siulersuisut naatsorsuutigaat.
Maannakkorpiaq inissisimaneq tunngavigalugu ingerlatseqatigiiffik atorunnaaratarsinnaasoq, NunaMinerals A/S børsimut nalunaaruteqarluni taama allappoq.
