NunaMineralsip akiliisinnaajunaarnini pisortatigoortumik nalunaarutigaa

Suliffeqarfiup annaanneqarsinnaanissaanut periarfissat ujartuiffigineqaraluarput, iluatsinngittumilli, suliffeqarfiullu akiliisinnaajunnaarneranik pisortatigoortumik nalunaarutiginnittoqarnissaa NunaMineralsimi siulersuisut isumaliutigilluareerlugu aalajangerpaat.

- Suliffeqarfiup nalunaarutaata normu 5-ip ukioq manna januaarip ulluisa tallimaanneersoq, normu 7-ilu februaarip ulluisa aappaanneersoq, normu 8-lu februaarip ulluisa 20-anneersoq, normu 9-lu marsip ulluisa 31-anneersoq innersuussutigalugit siulersuisut ajuusaarutigilluinnarlugu nalunaarutigaat suliffeqarfiup attatiinnarneqarnissaanut piginneqataasunut suliniutit iluatsinngitsoormata, NunaMineralsip aningaasalersorneqarnerata ingerlatiinnarneqarsinnaanissaa iluatsissinnaasimanani, NunaMineralsip siulersuisuisa nalunaarutaanni ilaatigut allassimavoq.

Aamma atuaruk NunaMineralsimi suli utaqqipput

Siunnersuut allannguutissatullu siunnersuutit arlallit Greenland Mining Managementimit marsimi apriilimilu tiguneqaraluarput, piginneqaasunilu annerpaat Namminersorlutik Oqartussat, siunnersuut ilalernartinngilaat, NunaMineralsillu aningaasalersoqqinneqarnissaanut pissutissaqanngitsoq nalunaarutigineqarluni.

Suliffeqarfiup pisussaaffini naammassisinnaanngilai, suliffeqarfillu taamaammat akiliisinnaajunnaarpoq, NunaMineralsip nalunaarutaani tamanna atuarneqarsinnaavoq.

- Tamanna tunuliaqutigalugu, inatsisitigullu pisussaaffiit naammassiniarlugit, suliffeqarfiup akiliisinnaajunnaarneranik Kalaallit Nunaanni Eqqartuussivimmut pisortatigoortumik nalunaarutiginnittoqassasoq, tamannalu piaarnerpaamik pissasoq, NunaMineralsip siulersuisuisa aalajangerpaat.

Aamma atuaruk Nunaminerals piffissaatillugu iliuuseqarfigineqanngilaq