Nunaminerals piffissaatillugu iliuuseqarfigineqanngilaq
Inatsisartunut ilaasortanut arfineq marlunnut KNR apeqqutinik nassitsivoq taakkuuppummi Nunamineralsip annaanneqarnissaanik periarfissiisussat, aningaasanik amerlanerusunik aningaasaliinikkut imaluunnit atukkat taarsersorneqarnerisa sivitsorneqarnerisigut.
Nunamineralsip ikiorneqarnissaannut iliuusissanik politikerit saqqummiussaqanngillat, Nunaminerals nunatsinni siorna aatsitassarsiornermut misissueqqissaarnermik suliaqarnersaavoq.
Inatsisartut aningaasaqarnermut akileraartarnermullu ataatsimiititaliaani ilaasortanut apeqqutit KNR-imit sapaatip akunnerani kingullermi nassiunneqartut akineqanngillat.
Aamma atuaruk Nunamineralsimut aningaasaliisinnaasoq isumaqatigiinniarfigineqarpoq
Ataatsimiititaliami siulittaasoq Jens Immanuelsen aamma ilaasortaq Jess Svane Siumut aamma akissuteqanngillat.
Demokraatit sivitsuinissaq kissaatiginngilaat
Demokraatit aningaasaqarnermut akileraartarnermullu oqaaseqartittagaata Tillie Martinussenip Nunamineralsimut atukkiunneqartut taarsersorneqarnerisa sivitsorneqarnissaat kissaatiginngilaa.
- Suliffeqarfiit imminut akilersinnaasumik ingerlanngitsut pisortanit ikiorneqarnissaat killeqanngitsumillu aningaasalersorneqarnissaat tunngaviusumik isumaqatiginngilara, Tillie Martinussen oqarpoq.
Aamma atuaruk Nunamineralsip annaanneqarnissaanut suli periarfissaqarpoq
Namminersorlutik Oqartussanit Nunamineralsimut atukkat 4,5 million koruunit taarsersorneqarnerisa sivitsorneqarnissaannut isummernissaminut Steen Lynge Atassummeersoq utaqqimaarallarpoq.
- Nunamineralsimik piginneqataasut allat aningaasaliiumanngitsut Namminersorlutik Oqartussat kisimiillutik Nunamineralsimik annaassiniarnissaat pissusissamisoortuunngitsoq isumaqarama, Atassut sinnerlugu Aningasaqarnermut Akileraartarnermuullu Ataatsimiititaliami ilaasortaq Steen Lynge oqarpoq.
Inuit Ataqatigiigiit sivitsuinissaq isumaqatigisinnaavaat
Nunamineralsip akiitsuisa 4,5 million koruuniusut taarsersorneqarnerisa sivitsorneqarnissaannik Inuit Ataqatigiit isumaqataasinnaapput, tamanna akisussaassuseqartumik pisinnaappat aamma Kalaallit Nunaanni Nunaminerals pillugu iliuusissaq oqallisigineqaqqaassasoq, Sara Olsvig oqarpoq, maannakkutut inissisimaneq pinngitsoortinneqassappat, IA-p siulittaasua Sara Olsvig oqarpoq.
Aamma atuaruk NunaMineralsip pisortaata pisuutitsineranut Siumut akissuteqartoq
Akiitsut taarsersorneqarnerisa sivitsorneqarnissaata oqallisigineqarnissaa Naaja Nathanielsenip IA-meersup kissaatiginartippaa, taanna partiimi siulittaasuminit isumalluarpalutsiginngilaq.
- Politikkikkut iliuuserineqarsinnaasut qaangiutereerput.
Tamassuma takutiinnarpaa piffissaatillugu iliuuseqannginneq pisariaqanngitsumillu nunarput ajoquserneqarluni, Naaja Nathanielsen KNR-mut taama allappoq.