NunaMineralsip pisortaata pisuutitsineranut Siumut akissuteqartoq
Nunamineralsip pisortaanera taama oqaaseqarpoq ingerlatseqatigiiffiup aningaasatigut ajornartorsiortup immikkut ittumik ataatsimeersuarnerani januaarip 29-ani pisumi. Ole Christiansenip isertuarani tassani saqqummiuppaa oqarluni Nunamineralsip maannakkut inissisimaneranut Naalakkersuisut siulii pisooqataasut.
AAMMA ATUARUK Pisortaq: Nunarput aatsitassarsiorfinngussappat, Nunarput eqeertariaqarpoq
- Siumumit uggoraarput naalakkersuinikkut Siumup ingerlatsinera tikkuartorlugu akisussaatillugu uparuartorneqarmat, Siumumit pingaartipparput Nunatsinni atugassat assigiimmik tamarmik suliffeqarfinnit pissarsissutaassasut, Suka K. Frederiksen, Siumumi politikkikkut oqaaseqartartoq, partiip tusagassiorfinnut nalunaarutaani taama allappoq.
Akileraarusiineq naammaginartoq
- Nunatta pisuussutaanik atuinerit akileraarusersorneri Siumumit isumaqarpugut aningaasanik iluanaarutissat eqqarsaatigalugit aaqqiissutaasoq naammaginartoq, soorluttaaq anguniagarigipput nunatta aningaasaliiffigissallugu maannakkornit suli pilerinarnerulersinnissaa, inussutissarsiornermi akileraarutip appartillugu naleqqussarneratigut, Suka K. Frederiksen oqarpoq.
AAMMA ATUARUK NunaMineralsip pisortaanera atorfimminit tunuarniuteqarpoq
Partiip tusagassiorfinnut nalunaarutaani erseqqissarneqarpoq, ingerlatseqatigiiffiup siunissami ingerlariaqqinnissaanut iliuusissat, pingaaruteqartorlu soorlu naalakkersuinikkut tamanna kissaatigineqarsimasoq, nutaamik ingerlariaqqinnissamut aningaasarsiornikkut immikkut pilersaarusiortoqarluni saqqummiussisoqartariaqartoq, Suka K. Frederiksen, Siumumi politikkikkut oqaaseqartartoq, partiip tusagassiorfinnut nalunaarutaani taama allaaserisaqarpoq.
