Pisortaq: Nunarput aatsitassarsiorfinngussappat, Nunarput eqeertariaqarpoq
Nunaminerals ajalusooqqajaavoq pisortallu issiavianit isigalugu Naalakkersuisut siulii tamatumunnga pisooqataaqisut, Ole Christiansenip immikkut ittumik ippassaq ataatsimeersuarnermi isertuutinngilaa.
Oqarpoq, Siumut Aleqa Hammondilu aatsitassarsiortut royaltiesinik akileraaruteqartarnissaannik taakkualu nakkutigineqarnerunissaannik neriorsuuteqarlutik qinersinermi marsip 13-ani 2013 ajugaammata, ulloq taaqisoq.
Aamma atuaruk Siulersuisut siulittaasuata Nunamineralsip ataannarnissaa qularutigeqaa
Piginnittoq isornartorsioraa
Tassalu aningaasaliisuni maannamut pingaarnerit, Namminersorlutik Oqartussat, suli Siumumit siuttuuffigineqartunit Naalakkersuisuuffigineqarneralluunniit, isornartorsiussallugit akunnatuungassutiginngilaa.
Tassami Nunarput aatsitassarsiorfinngussappat, Nunarput eqeertariaqartoq, pisortaq KNR-imut isumaqarpoq.
- Tassalu ajornartorsiutaavoq, Nunamineralsimuinnaq tunnganngimmat. Nunatta aningaasaliisartunit isigineqarneranut manna tunngavoq. Aatsitassarsiorneq Nunatsinni inuussutissarsiutit sukaasa sisamat ilagissappassuk, nunarput eqeertariaqarpoq inuussutissarsiummullu tamatumunnga isummertarnini iluarsillugu, Ole Christiansen oqarpoq.
Nunatta siunissaa pineqarpoq
Taanna isumaqarpoq, matumani Nunatta aatsitassarsiorfiusutut siunissaata qanoq ikkumaarnissaa pineqartoq.
Taassumalu aningaasaliisartut sumi nunarsuarmi tamaniittut, maani susoqarneranik malinnaanerat tikkuarpaa. Tamatumunnga tunngasumik Namminersorlutik Oqartussanit ikorfartorneqarusuppoq.
- Oqarusuppugut, Nunarput inuussutissarsiut tamaat pillugu ikorfartuinerusinnaasoq. Aamma Nunaminerals pillugu. Immaqa aningaasaniunngikkaluartoq, allatigulli tamatigut ikorfartuinikkut.
Qaaqqusiutigaluni appisaluussivoq
Ole Christiansen maannakkorpiaq neriuppoq, Namminersorlutik Oqartussat Nunamineralsimik annaassiniaqataassasut, aammali taakkununnga appisaluussilluni.
- Namminersorlutik Oqartussat uagutsinnik nersorinnikkaluarpata - taamaattunimmi sivisuumik tusanngilanga - taava nunanit allanit aningaasaleerusuttunik takkussuuttoqassagaluarpoq. Kisianni sumiunersoq peqquteqartumik misigisarpunga, soorluuku Namminersorlutik Oqartussaniittut nunanit allanit aningaasaliisussanik kissaateqanngitsut. Uanga nammineq taama misigisarpunga, Ole Christiansen KNR-imut oqarpoq.
