Nunamineralsip annaanneqarnissaanut suli periarfissaqarpoq
Aatsitassarsiornermut misissueqqissaartarfik Nunaminerals, Nunatsinni siorna tikillugu suliaqarnerpaasimasoq, piffissap sivikitsuararsuup iluani akiliisinnaajunnaarsinnaavoq. Namminersorlutik Oqartussanit atukkamik 4,5 millionit koruunit akilernissaannut januaarip naaneranut periarfissaqarsimapput.
Soormi atugaasa utertinnissaannut piffissaq sivitsorneqaruni, Naaja Nathanielsen aperivoq.
Inatsisitigut tamanna aporfissaqanngilaq, kingusinaareerporli Naalakkersuisut siulittaasuat oqarpoq.
- Saaffiginnissut taamaattoq Naalakkersuisunit akuerineqaqqaassaaq, kingornalu Inatsisartut aningaasaqarnermut ataatsimiititaliaanit, akileraartarnermullu ataatsimiititaliamit, Kim Kielsen oqarpoq. Ilanngulluguli erseqqissarpaa, akuersinerit atukkat akilernissaannut piffissarititaasoq qaangiutsinnagu pisimasussaagaluarmata, qaammatip ataatsip matuma siornagut.
Nunaminerals aningaasatigut assorsuaq ajornartorsiorpoq. Aatsitassanilli misissuisarfik ukiuni 17-ini atasimanermini suliassaminut aningaasannanniallaqqissimavoq. Nunaminerals nunatta karsianit koruunimut pissarsiminut ataatsimut, suliffeqarfiup nunani allamiunit nunatsinnilu namminersortunit tallimariaatai pissarsiarisarsimavai.