Politikki Inuussutissarsiutit

Nunamineralsimut aningaasaliisinnaasoq isumaqatigiinniarfigineqarpoq

Aatsitassarsiornermi mississueqqissaartarfik Nunaminerals A/S akiliisinnaajunnaarluni matusinnaavoq. Taama nalunaaruteqarpoq Nunamineralsimi pisortaq Ole Christiansen. Aatsitassarsiornermi misissueqqissaatarfiup Nunamineralsip piginneqataassutaasa annersaannik pigisaqartoq Namminersorlutik Oqartussat aningasaliinissamut soqutiginnittumik maanna isumaqatigiinninniarpoq, tamannalu iluatsissappat Nunaminerals ingerlaannarsinaavoq.

Allattoq Jaaku Lyberth, Ivik Kristiansen

marsip 02-at 2015 17:46

Aatsitassarsiornermi misissueqqissaartarfik Nunaminerals A/S akiliisinnaajunnaarluni matoriaannaavoq.

Taama nalunaaruteqarpoq aatsitassarsiornermi misissueqqissaartarfimmi pisortaq Ole Christiansen, taanna ataatsimiilluni ulapittoq piffissaqanngitsorlu radioavisiimiit oqatigineqarluni oqarpoq.

Nunamineralsip Namminersorlutik Oqartussanit aningaasat atukkat 4,5 million koruuniusut januaarip 31-at tikitsinnagu taarsinngippagit suliffeqarfik akiliisinnaajunnarluni matusussaagaluarpoq.

Aamma atuaruk Nunamineralsip annaanneqarnissaanut suli periarfissaqarpoq

Naalakkersuisut siulittaasuata Kim Kielsenip Nauja Nathanielsenip apeqquteqaataanut februaarip 25-ani akissuteqaataani ilaatigut ima oqarpoq:

- Aningaasaqarnermut Akileraartarnermullu Ataatsimiititaliarlu ataasinngornermi februaarip qulingiluaani isumasioqatigiinnginnermi Namminersorlutik Oqartussanut taarsigassarsianik matusiutigisumik akiliisinnaajunnaarnissamut pinngitsoortitsisumik toqqagassaqarsimanngitsoq Naalakkersuisut uppernarsarsinnaavaat, Kim Kielsen allappoq.

- Sulili neriunartoqartoq, Ole Christiansen isumaqarpoq.

Maanna isumaqatigiinniarput

Nunamineralsimi piginneqataassutit annersaannik pigisaqartut Namminersorlutik Oqartussat aningasaliinissamut soqutiginnittumik maannakkut isumaqatigiinniarput tamassumalu inernera Nunamineralsip siuinissaanik aalajangiisuussaaq.

Nunamineralsip pisortaata nalunaarutigaa, isumaqatigiiniarnerit pillugit ilisimatinneqartarluni, isumaqatigiinniarnerillu naammassineqarnissaannut killiliisoqangikkaluartoq piaartumik angusaqartoqarnissaa pingaaruteqartoq Ole Christiansen oqarpoq.

Isumaqatigiinniarnerit ajalusuussappata, Nunamineralsip maannakkutut inissisimanera eqqarsaatigalugu, Nunaminerals oqaluttuaannanngoriaannaavoq.

Aamma atuaruk NunaMineralsip pisortaata pisuutitsineranut Siumut akissuteqartoq

Aatsitassarsiornermi misissueqqissaartarfik aningaasanik tigoriaannarnik peqanngilaq aamma aatsitassarsiornermi misissueqqissaarnermik suliaqanngilaq taamaattumik suliffeqarfiup annertuunik aningaasaliiffigineqarnissani pinngitsoorsinnaanngilaa. Aningaasat taakkua aningaasaliinissamut soqutiginnitup atianik taaneqanngitsup aningaasaliissutigisinnaassagai Nunamineralsimi pisortap Ole Christiansen neriuutigaa.

Nutaarsiassami kukkunermik nassaarsimaguit uunga allaffigineqarsinnaavugut.