NunaMinerals nunanit allamiunit pigineqalerpoq
NunaMineralsip Naalakkersuisunut akiitsui 4,5 millionit koruuniusut aamma piginneqataassutini tuluit aatsitassarsiorfianut Greenland Mining Managementinut tunivai.
Tamatuma kingunerisussanngorpaa Nunamineralsip Naalakkersuisuinit taarsigassarsiai decembarimi 2014-mi taarsigassarsiarineqartut, GMM-imit taarserneqartusanngornerannik.
NunaMinerals taarsigassarsitinneqarpoq, misissueqqissaartarfiup aningaasatigut ajornartorsiornera qaangerlugu, Naalakkersuisut tusagassiuutinut nalunaaruteqarlutik taama allapput.
Ilutigitillugu Naalakkersuisut NunaMineralsimik piginneqataassutaat, taakkua piginneqataasutit pingasorarterutaat, tuluit aatsitassarsiorfiannit GMM-imit pigineqalerput.
Aamma atuaruk GMM: NunaMineralsip ingerlaannarnissaa pingaaruteqarpoq
Piginneqataassutit allannguutaat pillugit Naalakkersuisut oqaaseqartinniarneqaraluarput tamannali suli iluatsissinnaasimanngilaq. NunaMineralsimi pisortaq Ole Christiansen aamma oqaaseqartinneqaraluarpoq, taassumali NunaMineralsimi siulersuisunngortut taakkua ippassaq qinerneqartut oqaaseqartinneqarnissaannik innersuuppai.
NunaMinerals annaanneqassappat, aatsitassarsiorfik GMM kisiat isumalluutigisinnaasimavaat.
Inatsisartuni Aningaasaqarnermut ataatsimiititaliaq isumaqatigiissoq aaqqiissutigineqartumut isumaqataavoq.
Inuit Ataqatigiit Aningaasaqarnermut aamma Aatsitassaqarnermut oqaaseqartartua Naaja Nathanielsen tamanna pillugu ima oqarpoq;
- Pissutsit maannakkutut inissisimanerat eqqarsaatigalugu aaqqiissutaasinnaasut ajunnginnersaannik aaqqiisoqarpoq, maanna misissueqqissaartarfik ingerlaqqinneqarsinnaalerpoq tamannalu toqqissisimanermik pilersitsivoq, NunaMinerlasillu oqaluttuassartaa ajunnginnerulerpoq, akiliisinnaajunnaarnermit, Naaja Nathanielsen oqarpoq.
Aamma atuaruk NunaMinerals ataatsimeersuarpoq
NunaMinerals annaanniarlugu piginneqataassutit allanngortinneqarneranni, GMM piginneqataassutit 85 procentii piginneqataassutigilerpai, sinneri 15 procentit NunaMineralsimi piginneqataareersunit tigummiinnarneqarput.
Tamatuma kingunerilerpaa, misissueqqissaartarfik NunaMinerals tuluit aatsitassarsiorfianit Greenland Mining Managementimit pigineqalissammat, piginneqatigiissutit allanngortinneqarnerinut pilersaarutit pissusissamittut ingerlassappata.
Naaja Nathanielsen tamanna pillugu ima oqarpoq,
- NunaMinerals nunatsinni suli suliaqarpoq, Kalaallit Nunaannimi misissueqqissaarnerit ingerlanneqartassapput, aamma tassunga atatillugu nunatsinnut akileraarutinik akiliisoqartassaaq, taamaattumik NunaMinerals maannakkutut nutaanik piginneqartoqarluni aamma kalaallit nunaanni suliaqaannarnissaanik kissaallugu tikilluaqquarput, Naaja Nathanielsen Inuit Ataqatigiimmeersoq oqarpoq.
