NunaMinerals ataatsimeersuarpoq

Aatsitassarsioqatifgiiffiup, NunaMinerals A/S-ip siunissaa qanoq ittuussanersoq, suliffeqarfiup aningaasaliisuisa piginnittaasalu erngiinnaq nalunaaqutaq sisamanut Nuummi ataatsimeeersuarunik aalajangertussaassavaat.

Allattoq Apollo Jeremiassen

novembarip 25-at 2015 15:05

Aatsitassarsioqatigiiffiup siunissaa taamatullu ingerlariaqqinnissaa ataatsimeersuarnerup kingorna iluatseratarsinnaasoq, NunaMineralsip pisortaata, Ole Christiansenip KNR-imut qaammatip massuma qiteqqunnerani oqaatigaa.

Taama oqarnerminut tunngavilersuutigaa, tuluit aningaasaleerusullutik saaffiginnissimammata. Tamannali iluatsissappat suliffeqarfimmut piginneqataassutsinik aningaasaliisimasut annaasaqarnissaminnut piareersimasariaqartut.

- Tuluit aningaasaliisussat annaaneqarpata kikkut tamarmik aningaasaatiminnik annaasaqarnissaat naatsorsuutigineqarsinnaavoq taamatullu akiitsoqarfigisavut aningaasanik pisinnajunnaassallutik, aatsitassarsioqatigiiffiup pisortaa, Ole Christiansen KNR-imut qaammatip massuma qitequnnerani oqarpoq.

Aamma atuaruk Aviisi: NunaMinerals USA-mi aatsitassarsiorfinnik ingerlatsissasoq

Aamma atuaruk NunaMinerals ingerlaannarnissaa periarfissaqalaartoq

Kikkunut tamanut pitsaanerpaassaaq

Aviisi Atuagadliutit oktobarimi allaaserisaqaramik allapput, Namminersorlutik Oqartussat piginneqataassuteqartullu akuerissappassuk, tuluit suliffeqarfiat Greenland Mining Management, GMM annaasiniarnissaminut piareersimasoq, taamaaliornerminili suliffeqarfiup 85 procentianik piginneqataanissartik kissaatigalugu, taamaalillutik 10 millioner koruuninik aningaasaliinissaminnik piareersimallutik nalunaarlutik.

Tamassuma saniatigut NunaMineralsip sivikinnerpaamik ukiuni tulliuttuni pingasuni ingerlaqqinnissaa qulakkeersinnaallugu taamatullu akiitsoqarfigineqartut tamaasa akilersinnaallugit oqarlutik.

Namminersorlutik Oqartussani pisortat qullersaata, Søren Hald Møllerip GMM-ip pilersaarutaannut soqutiginnilluni, aviisimut Atuagagdliutinut oqarpoq aamma oqarluni taakku pilersaarutaat piviusunngussappat tamanna kikkunnut tamanut pitsaanerpaassasoq.

Namminersorlutik Oqartussat 4,5 millioner koruuninik NunaMineralsimit akiitsoqarfigineqarput.