Aviisi: NunaMinerals USA-mi aatsitassarsiorfinnik ingerlatsissasoq
Atuagagdliutini tamanna allaaserineqarpoq.
Tuluit ingerlatseqatigiiffiat Greenland Mining Management, GMM, aatsitassarsioqatigiiffiup NunaMineralsip akiitsoqaqisup annaanniarnissaanut isumaqatigiinniutissatut pilersaarummik Namminersorlutik Oqartussanut saqqummiussaqarpoq.
NunaMineralsip ukiumoortumik naatsorsuutaata qanittukkut saqqummiunneqarnerinut atatillugu annaassiniarnissamik pilersaarut saqqummiunneqarpoq.
GMM piginnittuunerup 85 procentianik pigisaqalernissaminut suliffeqarfimmut 10 millionit koruuninik aningaasaliissuteqarumasoq, Atuagagdliutini allaaserineqarpoq.
Kiisalu suliffeqarfik minnerpaamik ukiuni pingasuni ataannarsinnaaqqullugu aningaasaliissutissanik allanik qulakkeerinnikkumavoq akiligassaqarfiillu amerlarnerpaartaannut akiitsut akilerumallugit.
USA-miunerusorlu piiaavinnut suliffeqarfinnullu aningaasalersuisoqassaaq. Taakkunanngalu isertitat, GMM naapertorlugu, Nunatsinni aningaasalersueqqinnissamut atorneqassapput.
AAMMA ATUARUK NunaMineralsip ukiumoortumik nalunaarusiani saqqummiukkaa
Atuagagdliutini allaaserisaq naapertorlugu isumaqatigiinniarnissamut atatillugu saqqummiussaq maanna Namminersorlutik Oqartussani suliarineqarpoq, naalakkersuisullu siulittaasuata naalakkersuisoqarfiani pisortaq Søren
Hald Møller aaqqiissutissamik kikkunnut tamanut iluaqutaasussamik nassaartoqarnissaanik neriuuteqarluni.
Søren Hald Møllerip Atuagagdliutinut oqaatigaa ingerlatseqatigiiffik Namminersorlutik Oqartussanut 4,5 millionit koruuninik taarsigassaqartoq aammalu Namminersorlutik Oqartussat ingerlatseqatigiiffimmi piginneqataassutinik pigisaqartut.
- Taakkua qanoq pinissaat oqaloqatigiinnernut ilaatinneqarpoq, Søren Hald Møller oqarpoq, tamatumalu saniatigut allanik
oqaaseqarsinnaannginnerarluni.
NunaMinerals GMM-imit pigineqalissappat Inatsisartut akuersiteqqaarneqassanersut suli nalunartoq, aviisi Atuagagdliutit aamma allappoq.
