Visit Greenland: Takornariaqarnerup piffissaata iluatsinnissaanut piffissaasualerpugut
Nunatsinnut takornariartitsinermi piffissap iluatsinnissaa qaangiutingajalerpoq.
Visit Greenlandip pisortaanera, Hjörtur Smárason oqarpoq. Nunarput ammaaqqinnissamut pilersaarummik qaammammik ataatsimik sivisunerusumik pisariaqartitsisoq taanna oqarpoq.
Nunatsinnut aqqut decembarip ulluisa 30-anni matuneqarpoq.
Nunatsinnulli 600-t missaanniittut sapaatip akunneranut tikissinnaapput - taakkuli tamarmik corona pillugu allattoqarfimmit akuerineqaqqaartartussaallutik.
Timmisartukkut angallanneq nalinginnaasoq maajip ulluisa pingajuanni ammaqqippoq.
Timmisartumut ilaasut 600-t timmisartunut pingasunut 200-kkaarlugit agguarlugit sapaatip akunneranut tikissinnaalerseqqinneqarput.
Tikissinnaasut 600-nerat oqartussat misissornissaannut angumerisinnaasutut naliligaraat.
Angalasulli tamarmik tikinnerminnit ullut tallimassaanni suli misissorneqartassapput angerlarsimaannaqqaartassallutillu.
Arlaannik iliuuseqarfigineqarsinnaasumik nalunaaruteqartoqarnissaa pingaaruteqarpoq. Assersuutigalugu: akiuussutisserneqarsimanermut uppernarsaateqalissaagut, akiuussutissinneqarsimasut taamaalillutik isersimaannaqqaartussaanatik aggustimi nunatsinnukarsinnaallutik? pisortaq aperivoq nangillunilu:
- Taama nalunaartoqaraluarpat takornarialerisunut malunniuteqassagaluaqaaq, tassami takornarialerisunit maanna tusartarparput, sullitassaraluaminnit juulimi, aggustimi septembarimilu tikinnissaraluaminnik taamaatitsisunit ullut tamaaasa sianerfigineqartartut. Tassami qanoq pisoqarumaanera nalorninaqimmat, allamut angalaniaannalertarput
Nunatsinnukarniartunut ammaaqqittut
Nunatsinnut aqqut sapaatip akunnerata matuma siorna ammaqqinneqaqqippoq. Aqqut taann tunngaviusumik – decembarip ulluisa 30-annili matoqqalerpoq. Nunatsinnukartummi sapaatip akunneranut 600-t missaanniittartut – tamarmik corona pillugu allattoqarfimmit akuerineqaqqaarsimasarput.
Maanna angalanissamik Air Greenlandimut inniminniiniartut akuersissuteqarfigineqarnissaminnik qinnuteqaqqaartariaarupput.
AAMMA ATUARUK Nuummi inuit ammaaqqinneq pillugu: Aasaanerani maaniiginnassaagut
Nunatsinnukarnissamut malittarisassat maanna atuuttut maajip ulluisa 31-ata tungaanut atuutissapput – tikinnermiillu ullunit tallimani angerlarsimaannartarnissamut malittarisassaq piffissami tassani allanngussanngilaq.
Tamanna pissutigalugu nunatsinni takornariaqarnermik suliaqartut naammagittaalliorput: Karl Jørgen Enoksen Sisimiuneersoq taakkulu ilagaat, taassumalu aasaanerani ullut qaamaffianni takornariat pinngortitamut piniariartortittaraluarpai. Taassumali qaammatissiutaani maanna allattorsimasoqanngilaq.
- Uninngaannanngiivippunga, uninngaannartoqanngilaq periarfissanik allanik ujartuivunga, soorunami, Karl Jørgen Enoksen KNR-imut oqarpoq.
Pilersaarusiorsinnaannginneq neriutaarutissutigigaa
Taassumalu aasaaneranut pilersaarusiorsinnaannginnermut neriuutaarunnera Visit Greenlandimiit Hjörtur Smárasonip paasisinnaavaa.
Inuit peqqissuunissaannut isumannaaatsuunissaannullu taanna tunngasoq, politikerit oqarput. Coronalu peqqutigalugu sumilluunniit siorna pilersaarusiortoqarsinnaasimanngilaq. Tamakkualu tassa atuuttuunerat qanoq oqaseqarfigisinnaaviuk?
- Inuit peqqissuunissaat isumannaatsuunissaallu soorunami sallersaasariaqarput, tamatumunngalu Naalakkersuisut nunattalu nkorsaanera nersoratriaqarput - suliaammi pitsaalluinnarput. Kisianni taama aalajangernerup suna akigissaneraa aamma eqqarsaatigineqsrtariaqarpoq, Hjörtur Smárason oqarpoq.
AAMMA ATUARUK Takornarialerisut aasalersumi: Karl Jørgen ilungersortoq, Elise ulapippoq
- Takornarialerisuniit pilersaarusiortoqarnissaa kissaatigiinnarparput. Pissutsit – virusip uuma kingunerisaanik allanngortartut tamanit ilisimaneqarsoraara. Tamannalu aallaavigalugu pilersaarusiornissaq pingaaruteqaannarpoq.
Naalakkersuisut siulittaasuata, Múte B. Egedep takornarialerisut naammagittaalliuutaat paasilluarsinnaavaa. Taakkulu aggustip septembarilluunniit tungaanut naammagittartariaqartut oqaatigaa.
- Paasilluarsinnaavara inuussutissarsiortut inuussutissarsiutiminnut aallusserusulluarmata. Naalakkersuisut tassani paasinnilluarput. Kisiannili ammariartuaarneq massakkutut pilersaarutit aallaavigalugit aammalu illersorneqarsinnaasumik inuiaqatigiinni ingerlassappat, augustimi septembarimilu ammavissinnaaneq periarfissaalerumaartoq nalunaarutigivarput, siulittaasoq KNR-imut tallimanngormat oqarpoq.
