Coronap killilersuisitsingaatsiarnera Elise Bruunimut iluaqutaasoq Karl Jørgen Enoksenimut aarlerinarpoq. Assi: KNR

Takornarialerisut aasalersumi: Karl Jørgen ilungersortoq, Elise ulapippoq

Aasaq corona peqqutigalugu killilersuinertalik takornarialerisumut aarlerinarpoq, takornarialerisorli alla ajornartorsiunngilaq

Inuilaami alianaatsumi aavarneq, umimmanniarneq kangerlunnilu anguniarneq.

Sisimiuneersup Karl Jørgen Enoksenip takornarianut tamakkua neqeroorutaasa ilagaat.

Coronali killilersuisitsingaatsiarpoq. Nunarput avammut ammaqqinnikuuvoq, ullunili tallimani angerlarsimaannaqqusaaneq takornariaqannginnerulersitsivoq.

AAMMA ATUARUK Takornarialerisut naammagittaalliortut: Ammaaqqinneq takornariaqarnermut ajalusoortitsissaaq

Angerlarsimaannaqqusaanerli takornarialerisunut tamanut tulluanngitsoq, Karl Jørgen Enoksen isumaqarpoq.

- Takornarissat sullitassakka tikikkunik inuiaqatigiinnut akulerunneq ajorput ingerlaannaq aallaruttarpagut taavalu ulluni piniartitsivissatsinni asimiissuttarlugit, taanna oqarpoq.

- Aasaq naallugu periarfissaqanngilasi

Naalakkersuisut siulittaasuata Múte B. Egedep (IA) takornarialerisut naammagittaalliuutaat paasilluarsinnaallugu oqaatigaa. Qaammatinili tullerni naammagittariaqartut oqarluni.

Tamanna Karl Jørgenimut eqqissisaataanngilaq.

- Isumalluarnarpalaanngilaq. Uggornaraluartumik imatut paasineqarsinnaavoq takornarialerisut isaaninngaanniit: Aasaq naallugu periarfissaqanngilasi, Karl Jørgen Enoksen oqarpoq.

AAMMA ATUARUK Múte B. Egede takornarialerisunut: Staycation ikiorsiissutillu periarfissaraasi

Taanna aningaasanik ikiorsiissutinit tallimariarluni taperneqarsimavoq. 

Kisimiilluni takornariartitsisutut qaammaammut annerpaamik 23.000 koruuninik ikiorserneqarsinnaavoq. Kisianni coronap ajornartorsiortitsinerani aningaasanik qanoq annaasaqartigismanini oqaatigisinnaanngilaa.

Periarfissanilli ujartuilluni erseqqissarpaa.

- Uninngaannanngiivippunga, uninngaannartoqanngilaq periarfissanik allanik ujartuivunga, soorunami.

Elise Bruun allalluinnarmik misigisaqartoq

Angalatitseqatigiiffimmik Travel By Heartimik piginnittoq Elise Bruun allarluinnarmik misigisaqarpoq. Angalarusuttorpassuaqarpormi.

- Pisiniartut imaaginnaavipput. Januarimi ingasakkami. Tupinnaqaaq, Elise Bruun, Travel by Heartimik piginnittoq oqarpoq.

AAMMA ATUARUK Múte B. Egede: Inuit 75 procentii akiuussuserneqaqqaassapput

Taassuma nunatsinni killilersuisoqalermat, nunagisaq qimannagu angalasitsinernik piareersaaleerpoq.

- Ukiup aallartinnerani malunnarsivoq Danmarkimut maangaluunniit angalasoqarusunngitsoq. Taamaammat staycation atorneqartupilussunnguarpoq - ingammik ilaqutariinnit. Soorlu sulifffimmit akiliunneqarluni sulinngiffeqarnermi angalanerit staycationinut atorneqartupilussuanngorput. Tamannalu uannut iluaqutaasimaqaaq,

Elise Bruun oqarpoq. Tassami ukioq manna aningaasat kaaviiartitai ukioq kingullermiit amerlanerusut, taanna oqarpoq.

Elise Bruun taamaalilluni ikiorsiissutinik tatisimaneqarluni misiginngilaq.

AAMMA ATUARUK Tasiilami corona pillugu ernumanartoqanngilaq – takornarialli maqaasivaat

- Naamerluinnaq. Ikiorsiissutinik ukioq manna atorfissaqartissimanngilanga. Pisariaqanngilaq. Nammineersinnaaguma ikiorserneqartariaqanngilanga.

Elise Bruunimulli unammillernartoqarpoq. Tassami killilersuinermut appaaneq maajip 31-iata tungaanut atuuppoq.

- Namminersorlutik Oqartussat qaqugu ullunik tallimanik angerlarsimaannaqqaaqqusineq unissanersoq nalunaaruteqarnissaat pisariaqartikkaluarpara.

AAMMA ATUARUK Nunatta avammut ammaqqinnera Sisimiuni ernummataavoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat