Nuummi inuit ammaaqqinneq pillugu: Aasaanerani maaniiginnassaagut
Nunarput avammut ammaraluartoq Nuummi najugallit arlallit nunatta avataanut aasarsioriartorlutik angalanissaminnut suli nalornipput.
KNR-miit atuarfimmi sulisut apersoriartorpavut, taakkulu tamarmik akipput avammut angalanissartik unitsillugu.
Assi: Karline Platou
- Ukioq kingullerli nunanut allanut feeriarnissarput unitsipparput, namminermi akilertussaavarput angerlarsimasussaatitaanerput, tamanna perusunnagu Aasiannut feeriaannassaagut.
- Corona aallartimmalli aalajangerpugut nunanut allanut feeriarniarnata ingammik siaruaakkiartornera taamak sukkatigitillugu, Nuummi ASK-imi ilinniartitsisoq Mette Frederiksen oqarpoq.
Jørgen Steenholdt nuliilu aamma nunatsinni pisorujussuaannarniarput.
Assi: Karline Platou
- Siornatigut Danmarkimut feeriallattaartaraluarpugut feriefrirejseqaraangatta, massakkut feeriartarnigut allanngorput, timmisartorluta Kangerlussualiassaagut, taava Sisimiunut pisussaagut, Sisimiuniillu Aasiannut Qasigiannguanullu ingerlaqqissaagut ilaquttagullu tikeraarlugit.
Coronamulli tunngatillugu pissutsit atoruminarseriarpata Danmarkimut feeriaqqittalerumaarpugut, ASK-imi ilinniartitsisoq Jørgen Steenholdt oqarpoq.
Susanne Jørgensen ilaquttanilu Danmarkiliartussaagaluarput pilersaarutitilli allanngorteqqippaat.
Assi: Karline Platou
- Ilaqutariiulluta Danmarkiliarniaraluarpugut billetsillu tamaasa pisiarereeraluarpagut kisianni Danmarkimi suli killilersuinerit pissutigalugit qanittukkut aalajangerpugut Danmarkiliarnissaraluarput unitsiinnarniarlugu Nuummiiginnassallutalu.
Danmarkimimi nuannaariartarfiit suli killeqarput, taamaattumik maaniiginnassaagut imaanilu ipuserluni umiaasarnerit meeqqama misilissavaat, aammalu Kapisililiarnissarput eqqartorparput, ASK-imi pisortap tullia Susanne Jørgensen oqarpoq.