USA-p nannut nungutaanissamut aarlerinartorsiortutut nalilerpai
Canadap USA-llu nannut amerlassusaat ilisimasaqarfiginngilaat... aamma nungutaanissaminnut aarlerinartorsiornersut isumaqatigiinngissutigaat.
Sapaatip akunnerata tulliani uumasut nungutaanissamut aarlerinartorsiortut pillugit ataatsimiittoqarnissaani nannunit tunisassianik tamanik inerteqquteqalernissaq, USA-mit anguniarneqarniarpoq. Tamanna Canadap akueriumanngilaa, USA-llu inerteqquteqalersitsiniarnera akornuserniarsariniarlugu. Nunani tamalaani Canada kisiartaalluni tammajuitsussarsiniarluni nannunniarnermik ingerlatsisuuvoq aamma nannut amiinik nannunillu tunisassianik allanik tuniniaasarluni.
Uumasunik illersuiniaqatigiiffik, the Humane Societe International, nutaamik nalunaarusioqqammersoq, Canadami aviisip, Globe and Mail-ip allaaseraa. Nalunaarusiami nutaami oqaatigineqarpoq, nannunniartarneq aningaasarsiornermut pingaaruteqanngitsoq, taamaallaat naggueqatigiinnut Inunnut amerlanngitsunut pingaaruteqarnerarneqarluni. Aamma nannunniartitsisarneq periaaseq nutaajusoq oqaatigineqarpoq, tassami tamanna naggueqatigiit Inuit piniariaaserinngimmassuk, aatsaalli Europamiut Canadap issittortaanut pinerisa kingornagut aallartinneqarsimammat.
Nunavummi avatangiisinut pisortaqarfiup ukiuni sisamani tulliuttuni nannuttarineqarsinnaasut ukiut tamaasa ikileriartittarpai, 105-iniit 65-inut ikileriartinneqarlutik. Matumanilu oqaatigineqarluni nannunniartarneq Nunavimmiunut pingaaruteqartoq.
USA-p tammajuitsussarsiniarluni nannunniartarneq unitsikkusuppaa, kissaatigalugulu nunat Europamiittut tunisassianik nannuneersunik tamanik eqqussisinnaanissaq inerteqqutigilissagaat. Stephen Pinksenip Nunavummi avatangiisinut pisortaqarfimmeersup oqaatigaa, tammajuitsussarsiorluni nannunniartitsisarneq nannut amerlassusaannut sunniuteqarnavianngitsoq. Naggueqatigiit Inuit nannuttassinneqartarnerat ingerlaannassaaq, taamaalillutillu nannuttassatik tammajuitsussarsiniarlutik nannunniartunut atussanerlugit imaluunniit atugassaminnik nannunniassanerlutik namminneerlutik aalajangersinnaallugu.
