Tusagassiuut: Ministerip Issittumi Sakkutooqarfik nutaamik qullersaqarfeqalertariaqarsorigaa

Danskit illersornissamut ministeriata, Troels Lund Poulsenip Issittumi Sakkutooqarfimmut nutaamik qullersaqarfeqalernissaq Folketingimi partiit Issittoq pillugu nutaamik isumaqatigiissuteqarnialerpata ilaanissaa neriuutigalugu Danmarks Radiomut oqaatigaa.

Issittumi Sakkutooqarfik Nuummi umiarsualivimmi Royal Greenlandip allaffeqarfigisimasaani maanna qullersaqarfeqarpoq. Danskilli ministeriat aalajangiisinnaagaluaruni tassaniikkunnaassaaq.

Issittumi Sakkutooqarfimmut nutaamik qullersaqarfimmik sanaartortoqarsinnaanissaa takorloorsinnaaviuk, DR-imit tusagassiortoq aperivoq.

Aap, ministeri naatsumik akissuteqarpoq, oqarlunilu:

- Danskit tungaanniiit – tassanilu danskit naalakkersuisuisa tungaaniit isumaqarpunga – naalagaaffeqatigiinnermut minnerunngitsumillu Kalaallit Nunaannut tunngatillugu aningaasaliinermut eqqarsaatigeqqittariaqaripput qularutissaanngilaq.

- Annerusumik piujuartumillu najuutissagutta ullumikkornit pitsaanerusunik atortorissaaruteqartariaqarpugut. Taamaammat Issittumi Sakkutooqarfimmi ullumikkut ininit annerusunik pitsaanerusunillu peqarnissaa naleqquttuussaaq, Troels Lund Poulsen oqarpoq.

Ministerilli kissaatimi piviusunngornissaanut danskit partiivinit tamakkiisumik tapersiisoqartariaqartoq DR-imit apersorneqarnermini erseqqissaatigaa.

Folketingimi partiit issittoq pillugu isumaqatigiissut nutaaq septembarip ingerlanerani aalajangiiffigissavaat. Troels Lund Poulsenip nunanut allanut naalakkersuisoq, Vivian Motzfeldt aamma tyskit illersornissamut ministeriata tullersortaa, Dr. Niels Schmid ataatsimeeqatigiartorlugit ullumi Nuummiippoq.

KNR danskit illersornissamut ministeriannik imaluunniit nunanut allanut naalakkersuisumik, Vivian Motzfeldtimik apersuinissamut suli periarfissaqanngilaq.