Nunarsuarmi avinngarusimasumiittoq – ikuallattoqarnissaanulli piareersimasoq

Upalungaarsimanermut pisortap tullersortaata qatserisartut nersualaarpai, Tasiilallu eqqaani qatserisartut amerlassusaat pisariaqartitsinermut naleqquttutut nalilerlugit.
Jens Dahlip atortorissaarutit qanoq atorneqarnissaat Tunumi qatserisartunut ilinniartitsissutigigai Assi © : KNR / Markus Valentin
Allattoq Markus Valentin
novembarip 19-at 2026 10:48
Nutserisoq Connie Fontain

Qatserisartut inuusuttut Tasiilami iloqqasunngorlutik nikorfapput.

Qatserinermik misilittagaqarluartoq, Jens Dahl qatserisartut biiliisa atortui qanoq ateqarnersut qanorlu atorneqartarnersut ilinniartitsissutigiartorlugit ilinniartitsiartorluni Nuummiit tikippoq.

Sungiusarneq taanna akunnernik 74-inik sivisussuseqarpoq, ukiumullu ataasiartumik aaqqissuunneqartarluni, Tasiilap eqqaani qatserisartut taamaalillutik ilisimasaminnik attassiinnarsinnaapput.

Henrik Andreasen Tunumi upalungaarsimasut pisortaata tullersortigaa. Taassuma Tunumi upalungaarsimasunut atortorissaarutaannullu pissutsit qanoq iginerai apeqqut tulluusimaarluni akissuteqarfigaa:

- Ajornartorsiutaanngilaq.

Assi © : Henriette Simonsen / KNR

Henrik Andreasen EU-mi aallartitanit tikeraartoqaqqammerpoq. Aallartitat taakku nunatsinni upalungaarsimaneq ilisimasaqarfiginerulerniarlugu angalaaqqammerput.

Tasiilaq soqutigilluinnarpaat – pingaartumik allanut avinngarusimalluinnarnera pissutigalugu.

- Maani atugassarititaasut oqaluttuaraagut, taakkulu ilisarinnillutik anngaapput. Finlandimi Sverigemilu isorliunerusuneersut oqaloqatigaagut, Henrik Andreassen oqarpoq.

- Tasiilarmi avinngarusimalluinnarpoq, aamma avannamut, kujammut, kimmut, kitaanullu 650-it 700 kilometerillu angalasariaqarsinnaasarpugut.

Tasiilaq pillugu nangeqattaartuliaq

Allaaserisaq una Tasiilami inuuneq pillugu KNR-ip allaaserisaasa ilagaat.

Tusagassiortugut Tasiilami inunnik assigiinngitsorpassuarnik sapaatip-akunnerata ataatsip ingerlanerani oqaloqateqarput.

Ilungersunartut inuiaqatigiinnilu ullutsinni pisimasut nuannersut allaaserisami matumani sammineqassapput.

Nersualaarinninneq

Upalungaarsimasut sumiiffinni assigiinngitsuni qatserutinik misissuisarnerup saniatigut ukiup ingerlanerani suliassarpassuaqarneq ajorput.

Henrik Andreassenip illuni ukiumut ataatsimit marlunnut ikuallattoqartarnerarpaa. Aammali eqqaavimmi pinngortitamilu ikuallattoqartarpoq.

- Search and Rescue (SAR, aaqq.) angalaqatiginerusarparput, tassani politiit ikioqqugaangata ikiuuttarpugut.

- Qatserisartugut sumiiffimmi ilisimannilluartuupput, taamaammat ikioqqusoqaraangat qanoq ittumukalernerput amerlasuut ilisimareertarpaat.

Assi © : KNR / Markus Valentin

Upalungaarsimasut nunaqarfinni qatserisartut qanoq amerlatiginersut oktobarip aallartinnerani misissorpaat.

Tassani tupaallapput. Qatserisartummi amerlassusaat ajornartorsiortoqalissagaluarpat amerlassusissaannut naleqqulluarput.

- Nunaqarfinni qatserisartugut amerlasuut aalisartuullutillu piniartuupput, ulluuneranilu nunaqarfik qimattarlugu. Ajornerpaanerani qatserisartut affaat aallaqqasarput.

- Amerlanerit unnukkut angerlaqqittarput. Nunaqarfinnilu inuit amerlaneruneranni pisoqarnissaa aarlerinarnerusarpoq. Taamaammat pitsaasuuvoq.

Qatserisartut biilii nutaat qatserisarfimmi inissaqartinneqannginnertik pissutigalugu qulimiguulinnut mittarfimmiittarput. Taamaammat qatserisartut atortorissaarutiminnik aalleqqaarlutik suliassaqarfimminnukartariaqarput. Nutaamik qatserisarfeqalernissaa kommunalbestyrelsip aalajangerpaa. Assi © : Markus Valentin / KNR

Henrik Andreassenip qatserisartut Tunumi suliaqarnerat qanoq pingaartitsiginerlugu isertuutinngilaa.

- Qatserisartukka naleqartorujussuupput. Pikkoripput nersualaarneqartariaqarlutillu.

Qatserisarfik nutaaq

Henrik Andreassenip kommunalbestyrelsip nutaamik qatserisarfiliortoqarnissaa aalajangersimagaat oqaatigaa.

Tamanna qilanaarutigilluinnarpaa. Naallu atortorissaarutit biilillu nutaaliaanerusunik ukiuni kingullerni taarserneqaraluartut inissamik amigaateqartoqarpoq.

Atortorissaarutit tamarmik qatserisartut biiliiniittariaqarput, taamaalillutik ikeriarlutik ingerlapallassinnaassallutik. Qatserisartulli biilii nutaat qatseriarfimmut isertinneqarsinnaanngillat, taamaammat qulimiguulinnut mittarfimmiitsinneqartarput.

- Sanaartorneq aappaagu aallartinnissaa naatsorsuutigalugulu neriuutigaarput. Maannakkut qatserisarfipput 1957-imeersoq pisoqaangaatsiarpoq. Taamaammat nutaamik qatserisarfittaarnissarput qilanaaraarput. Utaqqisinnaanngingajappugut.

Henrik Andreassenip ukiut ingerlanerani Piterartarnerata nunallu sajuttarnerata qatserisarfimmut qanoq quppaatsitsisimanera takutippaa. Assi © : KNR / Markus Valentin