Sermersooq Nuummi inuusuttunut immikkut pisariaqartitsisunut piginnaanngorsaaniartoq

Inuusuttut timikkut, tarnikkut eqqarsartaatsikkulluunniit unammillernartoqartitsisut piginnaasaminnik toqqissisimanartumik sinaakkuteqarlutik ineriartortitserusuttut illoqarfiit pingaarnersaanni nutaamik neqeroorfigineqarlutik sammineqarput.

Allattoq Malunnguaq Kristiansen

aggustip 18-at 2025 07:30

Kommuneqarfik Sermersooq Nuummi inuusuttunut immikkut pisariaqartitsisunut Piginnaanngorsarnermut qitiusoqarfimmik pilersitsinialerpoq.

Inuusuttut timimikkut, tarnimikkut eqqarsartaatsimikkulluunniit unammillernartoqartitsisut najugarisartik qanillugu namminnerlu oqaatsitik atorlugit ikorfartorneqarsinnaalerput.

Taamaaliornikkut inuusuttut immikkut pisariaqartitsinertik pissutigalugu ilinniakkamik naammassinnissimanngitsut namminneq piginnaasaminnik ineriartortitsinissaminnut inuunerminnilu siunnerfeqalernissaminnut periarfissinneqassapput.

- Inuusuttut immikkut pisariaqartitsisut toqqissillutik tulluartumillu sumiiffigisaqarlutik piginnaanngorsarfeqarnissaat anguniagaraarput, Piginnaanngorsarnermik qitiusoqarfimmi aqutsisoq, Malene Henningsen Jensen nittartakkami taama oqarsimasoq allaaserineqarpoq.

Innarluutilinnut tarnikkullu nappaatilinnut immikkoortortaqarfimmi pisortaq, Mathias Knude Brusgaard tusagassiuutinut nalunaarummi ima oqarpoq:

- Qitiusoqarfik inuunermik naleqarnerulersitseqataassaaq, inuusuttunillu peqataasunut nammineernerulersitsilluni siunissamullu takorluugaqalersitsilluni.

Peqataasut toqqissillutik nakimaannerulernissarlu siunertaralugu suliaqaatigalutik aaqqissuussaasumik ukuninnga ilinniartinneqassallutik:

Ulluinnarni nammineq inuulernissamut ilinniarneq.

Inoqateqariaatsimik piginnaanngorsarneq.

Piginnaasanik paasinninneq aamma ilinniarnissamut sulilernissamulluunniit piareersarneq.

Peqqinneq, atugarissaarneq aamma nammineq inuunerisamut paasinninneq. Kiisalu inuiaqatigiinni aamma kulturikkut pisuni peqataaneq.

Suliniummi inuit sisamat inissaqartinneqarput.

Peqataasussat 16-it 28-llu akornanni ukioqartuussapput.

Tusarfiit: Nyt udviklingstilbud i Nuuk målrettet unge med særlige behov – Kommuneqarfik Sermersooq

Allisiguk

Inuusuttut Nuummi piginnaanngorsarnermi qitiusoqarfimmi nutaami inissamik neqeroorfigineqartinnatik inuusuttunut sullissisumit qitiusoqarfimmilu aqutsisunit qitiusoqarfimmi neqeroorummut naleqquttuunersoq nalilerneqaqqaartassaaq. Inuusuttoq kommunip iluani Nuummiinngitsoq najugaqaruni ineqartunut inissiamik tunineqarsinnaassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.