Trump Putinilu Alaskami eqqissinissamik isumaqatigiinniarnernik eqqartuisut - Ukrainemili sorsunnerit ingerlaannarput
USA-p præsidentiata Donald Trumpip ippassaq Ruslandip præsidentia Vladimir Putin Alaskami sakkutooqarfimmut tikilluaqquaa, tassanilu Ukrainemi sorsunneq eqqissinissamillu isumaqatigiinniartoqarsinnaaneq oqaluuserineqarput.
Ullormut atatillugu natersuaq aappalaartoq siaarneqarsimavoq, Trumpillu Putin ersaartaallugu tikilluaqquaa.
Taakkumi nunap siuttorisai marluk aamma 2019-imili naapissimanatik aatsaat naapeqqipput, taamaalillutillu ukiut pingasut sinnerlugit matuma siorna Ruslandip Ukrainemik tiguaaneranilli aatsaat naapipput.
Ataatsimeersuarneq angusaqarfiunngitsoq
Tamatuma kingorna nalunaaquttap-akunneri pingasungajaat ataatsimeeqatigiipput, tamatumalu kingorna tusagassiortunik katersortitsinermi ataatsimiinneq iluaqutaasimasoq illuatungeriit tamarmik oqarput, angusanilli tigussaasunik saqqummiussinngillat.
Tusagassiortunik katersortitsinermi Putinip oqaaseqarfiginerusaani Ruslandip Ukrainemik akerleriissuteqarnini unitsikkusulluinnaraa, USA-mullu attaveqarnini nakussatsikkusukkaa Ruslandip præsidentiata oqaatigaa - tamatumalu kingorna Trump Moskvami ataatsimeersuarnissamut qaaqquaa.
Tusagassiortunik katersortitsinerup kingorna Trump Fox News-imit apersorneqarami NATO isumannaallisaanerlu pillugit oqaloqatigiissimallutik oqarpoq. Aammalu Putinip Ukrainemilu præsidentip Volodymyr Zelenskyjip ataatsimeeqatigiinnissaat sulissutiginiarlugu oqarpoq.
Russit isumaqatigiissuteqarnissamut saqqummiussaannik sunilluunniit akuersinissamik Trumpip Ukrainemiut kajumissaarpai.
- Maanna præsident Zelenskyj aalajangiisussanngorpoq, aamma Europami naalagaaffiit akuliuttariaqartut oqartariaqarpunga, tamannali pillugu præsident Zelenskyj aalajangiisuussaaq. Kissaatigippassullu tulliani ataatsimiinnermi najuukkusuppunga, Trump Fox Newsimut oqarpoq.
Europa Ruslandimik tatisiinnartoq
Zelenskyj Trumpimik ippassaq ataatsimeeqatiginnereernermi oqarasuaatikkut oqaloqatigiissimallutik ataasinngorpallu Washington D.C.-mut aallarniarluni ullumikkut siusinnerusukkut inuit attaveqaqatigiittarfianni X-imi allappoq.
Ukrainep, USA-p Ruslandillu ataatsimeersuarnissaat tapersersorlugu allaaserisami aamma ersersippaa, "USA-li peqatigalugu isumannaallisaanikkut qularnaveeqqusiinissaq qulakkeerniarlugu europamiut tamatigut peqataatinneqartariaqartut" erseqqissarpaa.
Europami siuttut arlallit eqqissinissamik isumaqatiginninniarnerit aamma tapersersorpaat.
Ullumikkut ataatsimut nalunaarummi ilaatigut Frankrigip præsidentiata Emmanuel Macronip, Tysklandip kansleriata Friedrich Merzip, Tuluit Nunaata ministeriunerata Keir Starmerip aamma EU-mi Ataatsimiititaliarsuup siulittaasuata Ursula von der Leyenip sorsunnerup unitsinnissaanut iliuuseqarnerit isumalluartutut isigaat.
Ataavartumilli eqqissineqalernissaata tungaanut Ruslandimut pillaatisiassatut iliuusissat sakkortusineqarnissaat aamma Ukrainep nunani nammineq aqussinnaagaa erseqqissarpaat, "nunarsuarmimi tamarmi killeqarfiit pinngitsaaliilluni allanngortinneqarsinnaanngimmata".
- Ukrainep oqartussaassutsiminik nunamilu killeqarfiisa innarligassaannginneranik illersuisinnaaneranik killissaanngitsumik qulakkeerinnittoqassaaq. USA-p qularnaveeqqutinik taamaattunik tunniussinissamut piumassuseqarneranik præsident Trumpip nalunaarutaa nuannaarutigaarput, nalunaarummi allassimavoq.
Danskit ministeriunerat Mette Frederiksen (S) aamma Alaskami ataatsimeersuarneq pillugu oqaaseqarpoq, kisiannili taamatulli isumalluarnartiginngilaq. Ullumi DR-imi apersorneqarnermini Ruslandip eqqissinissamik kissaateqarneranut takussutissaqannginneraavoq.
- Sakkuaakkunnaartoqanngilaq isumaqatigiissuteqartoqaranilu. Russilli unnuaq naallugu qaartartumeerisarput, tamannalu Ruslandip eqqissinissamik kissaateqannginneranut uppernarsaataavoq, DR-imut oqarpoq.
