Tusagassiuutit: Trumpip Zelenskyj Alaskamut qaaqqunialikkersaaraa

Præsidentip illorsuata USA-p præsidentiata, Donald Trumpip Ruslandip præsidentianik Vladimir Putinimik Alaskami tallimanngornermi ataatsimeeqateqarnissaanut Ukrainep præsidentia, Volodymyr Zelenskyj qaaqqunialikkersaarpaa.

Amerikamiup qaffasissumik atorfillip aqqata oqaatigineqanngitsup tamanna amerikamiut tusagassiorfianut NBC-mut paasissutissiissutigaa.

Inuit pingasut aqqi aamma taaneqanngitsut suliamik ilisimannittut isumaliutersuuteqarnerat uppernarsarpaat.

Qaffasissumik atorfeqartup tamanna "periarfissaalluinnartoq" oqaatigaa.

- Taamaattoqarnissaa tamanit neriuutigineqarpoq, atorfilik atilerneqanngitsoq NBC Newsimut oqarpoq.

- Præsidentip siuttut marluk peqatigalugit pingasuullutik ataatsimiinnissartik ammaffigaa. Præsidentip illorsuata illuttut sinilimmik ataatsimiinnissaq præsidentip Putinip noqqaassutigisaa maanna ukkataraa, atorfilik oqarpoq.

Ataatsimiinnissaq qularnartoq

Isumaliutersuutini Zelenskyjip Putin inimi isersimaqatigissaneraa eqqarsaatigineqarnersoq, tusarfiit NBC Newsip oqaloqatigisaasa akissuteqarfigisinnaanngikkaat, tusagassiuutit allapput.

Trumpip Putin Zelenskyjilu ataatsimut ataatsimeeqatiginissaat ammaffigigaa, præsidentip illorsuani atorfillip aqqatigut taaneqanngitsup nutaarsiassaqartitsivik Reutersimut uppernarsarpaa.

USA-p Ruslandillu præsidentiisa akornanni ataatsimiinnissaq maanna piareersarneqaleruttortoq tusarfiup Reutersimut ilanngullugu oqaatigaa.

Ukrainemi naalakkersuisut NBC Newsip oqaaseqartitsiniarnera uterfigeqqinngilaat.

Putin Alaskami

Donald Trumpip Putin Alaskami aggustip 15-iani ataatsimeeqatigissallugu arfininngornermi nalunaarutigaa.

Siuttut marluk Ruslandip ukiuni pingasuni affaanilu Ukrainemut sorsuttareernera qanoq ililluni naammassineqarsinnaanersoq ataatsimiinnermi oqaloqatigiissutigissavaat.

Nunat marluk nunanik avitseqateqatigiinnissaanut isumaqatigiissut ilaasinnaasoq Trumpip oqaatigaa.

Ukrainep nunamik tunniussinissaq piareersimaffiginngikkaa Zelenskyjip inoqatinut attaveqaatikkut X-ikkut arfininngornermi nalunaarutigaa.

- Ukrainep nunataa Ukrainemi naalakkersuinikkut aaqqissuussinermeereernera apeqqummut akissutissaavoq. Tamanna kimilluunniit allortinneqassanngilaq – allanngortinneqarsinnaanavianngilarlu.

- Ukrainemiut nunaminnik tiguaasumut tunniussinavianngillat, Zelenskyj Rusland innersuullugu oqarpoq.