Rusland Kyivimut sakkortuumik saassussisoq

Rusland ataasinngornermi ullaassakkut missilerpassuarnik igeriussilluni timmisartuararpassuarnillu ungasianit aqunneqartartunik atorluilluni Ukrainep illoqarfiisa pingaarnersaannut Kyivimut saassussivoq.

Ikinnerpaamik ataaseq toqutaavoq.

Nutaarsiassaqartitsiviup AFP-p allaaserisaa naapertorlugu, Kyivip sakkutuunut pisortaqarfiata siuttua, Tymur Tkatjenko, taama nalunaaruteqarpoq.

- Inuk ataaseq saassussinerup malitsigisaanik ajunaartoq pillugu paasissutissanik ajoraluartumik pissarsivugut, taanna oqarpoq.

Inuit marluk ullaassaq saassussinermi ikilerneqarsimasut ilanngullugu paasissutissiissutigaa.

Illoqarfiup immikkoortui sisamat saassussinermi eqqugaasut, Kyivip borgmesteria, Vitalij Klytjko, Telegramimi allappoq.

Annaassiniartartut nakorsallu illoqarfiit pingaarnersaata immikkoortuini arlalinni ataasinngornermi ullaakkut najuupput.

Angerlarsimaffiit arlallit, pisiniarfik atuarfillu saassussisoqanrnerani ikuallalertut paasissutissiissutigineqarpoq. Aamma meeqqerivik, pisiniarfiit arlallit metrollu unittarfiata Lukjanivskap isaariaa aserfallassimasut nalunaarutigineqarpoq.

Metrot unittarfii eqqorneqatsaaliorluni qimaaffissatut atorneqartut

Nutaarsiassaqartitsiviup dpa-p allaaserisaa naapertorlugu, metrot unittarfiata ilua inuit ullaassaq saassussisoqarnerani qimaaffigisimasaat pujortorujussuusoq, Ukrainemi tusagassiorfiit allapput.

Russit saassussigaangata, innuppassuit metrot unittarfiinut qimaasarput.

Aamma Ukrainep illoqarfiisa annerpaata tulliani, Kharkivimi, unnuaq qaartoqarsimasoq nalunaarutigineqarpoq. Reutersip allaaserisaa naapertorlugu, nunap ilaanut guvernøri, Oleh Synjehubov, taama paasissutissiivoq.

Kharkovimi Ukrainep avannaata kangisissuaniittumi qaartoqarneranut atatillugu ajunaartoqarnersoq ikilertoqarnersorluunniit paasissutissiissutigineqanngilaq.

Ukrainep præsidentiata, Volodymyr Zelenskyjip, Ruslandimik eqqisseqatigiinnissamut isumaqatigiinniaqqinnissamik siunnersuuteqarnerata aqaguani saassussisoqarpoq.

/ritzau/