Zelenskyj: Rusland unnuakkut saassussinermini dronenik 400-nik aallartitsivoq

Pingasunngornerup unnuaani Ruslandip Ukraine qaartartut 18-it dronellu 400-t atorlugit saassukkaa, Ukrainep præsidentia Zelenskyj oqarpoq. 

Reuters taama allappoq. 

Ullut marluk tulleriisillugit Ukrainemi saassussinerit annertuut nalunaarutigineqarput. 

Ruslandip nunanut allanut ministeriata Sergej Lavrovip illuatungimi Amerikami nunanut allanut ministerip Marco Rubiop Malaysiami ataatsimeeqatiginerani tamanna pivoq. 

Ukrainep kangiani illoqarfimmi Kostjantynivkami saassussinerni inuit pingasut toqutaasut, Reuters naapertorlugu Ukrainemi upalungaarsimanermut oqartussaasut pingasunngornermi unnukkut ilisimatitsipput. 

Inuk ataaseq aamma ikiligaasimavoq. 

Attaveqaqatigiittarfimmi Telegrammimi ikkussami saassussinerup allaffeqarfissuaq aserortersimagaa allassimavoq, tassanilu upalungaarsimasut toqungasut marluk aseqqukuni siumorsimavaat. 

Qatserisartut aamma illut assigiinngitsut sisamat ikuallannerinik qatserisimapput. 

Akunnerni qulini saassussineq 

Qaammatini arlalinni Kostjantynivka Ruslandip saassunniarsimavaa. Illoqarfik nunap ilaani Donetskimiippoq. 

Siusinnerusukkut Vadym Filashkin, Donetskimi guvernøriusoq, Donetskimi innuttaasut illoqarfimmit qimaasariaqarnerminnik "Ukrainemilu nunat ilaannut ulorianarpallaanngitsunukarnissaminnik" isumaliutiginnittariaqartut, Telegramimi allappoq.   

Ukrainep illoqarfiisa pingaarnersaat, Kyiv, aamma Ruslandimit saassunneqarsimasoq nalunaarutigineqarpoq.  

Illoqarfimmi sakkutooqarfiup allaffeqarfia naapertorlugu inuit marluk toqutaapput aqqaneq-marlullu missaat ikilerneqarlutik. 

-Ajoraluartumik inuit marluk toqutaapput. Taakkuupput russinit toqunneqartut, Reuters naapertorlugu Kievimi sakkutooqarfiup allaffeqarfiani pisortaq Tymur Tkachenko Telegramimi oqarpoq. 

Kyivimik saassussineq nalunaaquttap-akunnerini qulingajanni sivisussuseqarsimasoq, sakkutooqarfiup allaffeqarfia aamma ilisimatitsisoq AFP allappoq.