Ministerit marluk tikilersut tyskinillu tikittoqarnera – isumannaallisaaneq inatsiseqarnermullu tunngasut oqaluuserineqassasut

Peter Hummelgaardip Naaja Nathanielsenillu inatsiseqarnermut tunngatillugu suliniutit Nuummi ataasinngornermi saqqummiutissavaat. Troels Lund Poulsenip Vivian Motzfeldt ataatsimeeqatigissavaa – tyskinik aamma peqataasoqassaaq.

Allattoq Markus Valentin

aggustip 15-at 2025 14:51

Nutserisoq Connie Fontain

Nuuk ministerinit sapaatip akunnerata tulliani ataasinngornermi tikeraarneqassaaq.

Tusagassiuutinut nalunaarut naapertorlugu danskit inatsiseqarnermut ministeriata, Peter Hummelgaardip (Socialdemokratiet) inatsiseqarnermut naalakkersuisoq, Naaja Nathanielsen (IA) peqatigalugu Hans Egedep Illuani ataasinngornermi nalunaaqutaq 17.15 tusagassiortunik katersortitsissapput.

Nunatsinni inatsiseqarnermi suliniutit nutaat tassani saqqummiunniaraat nalunaarummi allassimavoq.

Tamatuma saniatigut illersornissamut ministeri, Troels Lund Poulsen (Venstre) ulloq taanna aamma Nuummiissasoq KNR-ip paasivaa.

Tyskit sakkutuuisa umiarsuaat 'Berlin' arfininngornermit marlunngornermut Nuummi umiarsualivimmiissaaq. Tyskit Ambassadeta Facebookikkut saqqummiussaani allassimavoq.

Tyskit illersornissamut ministeriata tullersortaa ulloq taanna Nuummut aamma tikinniartoq tassungalu atatillugu Troels Lund Poulsen aamma Vivian Motzfeldt ataatsimeeqatigissagai KNR-ip paasivaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.