Kalaallit piviusulersaarusiaat Nunat Avannarliit Siunnersuisoqatigiivisa Filminut Nersornaasiuttagaannut innersuunneqartoq
Kalaallit piviusulersaarusiaat WALLS – Akinni Inuk 2025-mi Nunat Avannarliit Siunnersuisoqatigiivisa Filmimut Nersornaasiuttagaannut innersuunneqarpoq.
Sofie Rørdam aamma Nina Paninnguaq Skydsbjerg filmimi ilitsersuisuupput, Emile Hertling Péronardilu Ánorâk Filmimeersoq ingerlatsisuulluni.
Piviusulersaarusiaq ukiuni arfineq-pingasuni suliarineqarsimasoq arnanut kalaallinut marlunnut, Ruthimut Ninamullu, Nuummi pineqaatissinneqarsimasunut inissiisarfiup matoqqasortaani inuunerminni imminnut ilisarisimasariilersunut tunngavoq.
Oqaloqatigiinnerit pineqaatissinneqarsimasunut inissiisarfimmi nunattalu pinngortitaani immiussat aallaavigalugit ikinngutigiinneq nalinginnaanngitsoq, kingunerlutsitsinerit assigiit – aamma kiffaanngissuseqalernissamik neriuut – oqaluttuarineqarput.
Filmi kalaallinit sunniuteqarfigilluarneqartoq
Filmi kalaallinit naliliisartunit Klaus Georg Hansenimit, Ane Lena Fussing Rosbachimit aamma Inuk Jørgensenimit toqqarneqarsimavoq.
WALLS – Akinni Inuk-mik toqqaasimanertik pillugu filmimi sammisat artornartut soorlu toqutsisarnerit, pineqaatissinneqarsimasunik inissiisarnerit, nakuuserneq sumiginnaanerillu sapiilluni sammineqartut taakku allapput - filmiliortulli ingasattajaarpallaarnatik sunniiniarnermillu siunertaqaratik filmiliorsimasut erseqqissaapputtaaq.
- Filmili kissalaarnermik, neriulluarniarnermik allaallu quiasaarnermik imaqarpoq. Piviusulersaarusiaq nuannersumik toqqaannartumillu oqariartuuteqartumik oqaluttualiaavoq, ilaannikkullu quiasaarpaluttumik ilaneqartarluni, oqaluttuallu kalaallinit sunniuteqarluarfigineqarsimapput, naliliisartut allapput.
Ilitsersuisunngorlaaq misilittagaqarluartorlu
Sofie Rørdam piviusulersaarusiornermik inuillu pisinnaatitaaffiinik suliaqarnermik tunuliaqutaqarpoq, nunatsinnilu pineqaatissinneqarsimasunut inissiisarfiit pillugit ilisimasaqalerneratigut suliniut aallartippoq.
Nina Paninnguaq Skydsbjergip Walls – Akinni Inuk ilitsersuisuuffigeqqaarpaa, kalaallillu nipaasa piginnaaneqarnerisalu inissaqartinneqarnissaat kissaatigiuarsimavaa.
Emile Hertling Péronard kalaallinut filmiliortartunut qitiuvoq, siornatigullu nersornaatinik pissarsiffiusimasunik soorlu Twice Colonized-imik, SUMÉ – The Sound of a Revolution-imik aamma Music for Black Pigeons-imik suliaqarsimavoq.
WALLS – Akinni Inuk-p innersuunneqarneratigut kalaallit filmiliaat kulturikkut nersornaatinut ataqqisaasunut innersuunneqarsimasut pingasunngorput. 2023-mimi filmi Alanngut Killinganni innersuunneqarmat siullerpaamik kalaallit filmiliaat nersornaaserneqarnissamut innersuunneqarpoq, siornalu filmiTwice Colonized innersuunneqarpoq.
Nersornaat 2005-imilli ukiut tamaasa Nunat Avannarliit Siunnersuisoqatigiivisa kulturikkut nersornaasiuttagaanut ilaavoq, 300.000 koruuninillu aningaasartaqarpoq, taakkulu filmi pillugu oqaluttualiortumut, ilitsersuisumut ingerlatsisumullu naligiimmik agguaanneqartarput.
Ajugaasoq oktobarip 21-ani saqqummiunneqassaaq.
