Nuup Bussiini eqqissiviilliornerit aserorterinerillu nakkutilliisut annikillisissavaat

Nuummi bussini inuusuttut akornanni aserorterinerit sioorasaarisutullu pissusilersortarnerisa ilaasut aquttullu toqqissisimajunnaarsittarpaat.

Taamaammat siunissami sapaatit-akunnerisa naanerini piffissani aalajangersimasuni bussiniittalernissaannut Nuup Bussiisa Nuuk Vagtservice isumaqatigiissuteqarfigaa.

- Aquttoqarpugut ilaasoqarlutalu toqqissisimanngissinnaasartunik. Pingaartumik aquttutta unnukkut ingerlaartillutik toqqissisimannginnertik piffissami sivitsortumi oqaatigisarpaat, Nuup Bussiini pisortaq Niels Chemnitz Frederiksen oqaluttuarpoq.

Inuusuttut sapaatit-akunnerisa naanerini unnukkut toqqissisimajunnaarsitsisartut

Toqqissisimannginneq ilaatigut, inuusuit arlalikkuutaarlutik sapaatit-akunnerisa naanerini kingusissukkut busseqattaartarnerinik pissuteqarpoq.

- Meeqqat atuarfiini atuartut tamakkerlutik bussinut akeqanngitsumik ilaasinnaanissaannut aaqqissuussaqarpugut. Unnungaatsiarnissaatalu tungaanut bussiniit bussinut nooqattaarlutik kialaarfittut atuisartut amerlasoorpassuupput.

Aquttut ilaasa bussit angallassissutaannaanerinik isersimaarujoortarfiunnginnerannillu inuusuit nassuiaakkaangamikkit iluatsissinnaasarpaat, aquttulli ilai inuusuttorpassuit unnukkut ataatsikkorsuaq bussinut issoraakkaangata toqqissisimajunnaarsinnaasarput. Aquttummi ilaasullu inuusuit sioorasaarisutut pissusilersortutut misigisinnaasaraat, Niels Chemnitz Frederiksen nassuiaavoq.

- Taakkuugunarpullu inuusuit namminneq toqqissisimananngitsumi angerlarsimaffeqartut. Amerlasuukkaarlunilu ingerlaaqatigiikkaanni ataatsimut eqqarsartaaseqalernermik peqalilaartoqarsinnaasarpoq sapiinnerulaalertarlutillu.

Iluarsaanermut aningaasartuuterpassuit

Bussini aserorterineq aamma toqqissisimannginnermik pilersitseqataasarpoq, ajornartorsiut tamanna pingaartumik unnungaatsiartukkut pilertarpoq.

Tassani inuusuit issiavinnut tunorlernut bussit assiliiviisa inugaannut katersuuttarput.

- Issiaviit alittorlugit aqequtaat tamakkerlugu piiartarpaat, Niels Chemnitz Frederiksen oqarpoq.

- Takusinnaasatsitullu issiaviit ilittorneqarnerini sakkumik ipittumik nassataqartarsimassapput.

Issiaviillu aserorterneqarnikut Nuup Bussiinut malunnaatilimmik aningaasartuutaangaatsialeqqammata, massakkut issiaviusut siunissami plastikkinik taarsersornissaat suliffeqarfiup aalajangiuppaa, taakkumi aserorteruminaannerullutillu titartaaffigineqassappata qalipariaannaanerummata.

- Soorunami ilaasunut atoruminaannerulaassagaluarput, taamaaliortariaqarsorivulli, issiaviimmi aserornikut uagutsinnut aningaasartuutaangaatsialeqqanerat pissutigalugu, Niels Chemnitz Frederiksen oqarpoq.

Ajornartorsiummi imak annertutigaaq Nuup Bussiisa peqqumaasiviani malinnaaniarneq ajornakusoorsilluni.

- Issiaviit ikitsut oqaluuserinngilavut – amerlasoorparpassuupput. Peqqumaasivitsinniittummi nungupallattorujussuusarput. Covid-19 kingornali kingoraartissanik pissarsiniarneq ajornarnerulernikuuvoq, taamaalillutalu bussinik ajorluinnartunik ingerlaartariaqartarpugut, Niels Chemnitz Frederiksen oqarpoq.

Nakkutilliisoqarneq uggornaraluarpoq suliniulli pisariaqarpoq 

Nuuk Vagtservicemeersut nakkutilliisut tallimanngorneq arfininngornerlu nalunaaqutaq 20:30-miit 00:30-mut kiisalu sapaammi ullaakkut nalunaaqutaq 06:00-imiit 09:00-ip tungaanut bussiniittassapput.

Aquttunut ilaasunullu toqqissisimatitsinissap saniatigut nakkutiginnittutut bilitsinillu misissuisutut atuuffeqassapput – tamatumunnga ilanngullugu allap allagartaanik unioqqutitsilluni atuisoqannginnissaanut qulakkeerisuussapput.

Niels Chemnitz Frederiksenip nammineerluni, bussini nakutilliisoqalertitsisariaqarneq uggornartumik ineriartornertut isigaa – kisianni aamma ajoraluartumik pisariaqartutut.

- Illoqarfimmi soorlu Nuummitut ittumi bussini nakkutilliisoqartariaqalernera soorunami uggornarpoq. Kisianni illoqarfik tamaat isigalugu sumiiffinni amerliartuinnartuni nakkutilliisoqartoq takusinnaavat. Tassa ajornartorsiut tamanna kisitta atunngilarput, Niels Chemnitz Frederiksen oqarpoq.

Nuuk Vagtservicelu isumaqatigiissutaat qaammatini marlunni pissaaq, tamatuma kingorna Nuup Bussiisa suliniut aserorterisukinnerulernermik kinguneqarnersoq pillugu naliliissaaq.