Nunatsinni Issittumilu illersornissaqarnerup pitsanngorsarneqarnissaa sivisuumik pilersaarutaavoq.

Tamanna pillugu Danmark suleqatigiinnermut Atlantikup avannarpasissuani imaatigut sillimaniarnermut pitsanngorsaanissamut Tyskland, Canada aamma Norge peqatigalugit ilannguppoq.

Tyskillu illersornissamut ministeriata tulliata, Dr. Nils Schmidip  suleqatini nunanut allanut ilisimatusarnermullu naalakkersuisoq, Vivian Motzfeldt aamma danskit illersornissamut ministeriat, Troels Lund Poulsen suleqatigiineq taanna pillugu oqaloqatigiartorlugit ullumi Nuummiippoq.

Illersornissamut ministereqarfik naapertorlugu ministerit pingasut Issittumi aamma Atlantikup avannaani ineriartorneq aamma iligiit suleqatigiinnermut pitsanngorsaanissamut periarfissat oqaluuseraat.

Taakkulu alapernaarsuummit Tritonimit maanna tusagassiortunik katersortitsipput.

- Nunarsuarmi sillimaniarneq Issittumut allanngorpoq. Tassa Issittumi politikkerput periuserpullu naleqqussartariaqarpagut. Issittumi sumiiffiup sakkutooqarnikkut aaqqiagiinngiffiusinnaavoq. Sakkuaattoqannginneranik attassiniarluta illersornissaq annertusartariaqarparput. Sakkutooqarnikkut pitsanngorsaanata eqqissisimanermik attassiniarneq periarfissaajunnaarpoq.

- Ineriartorneq nutaajuvoq nunatsinnilu amerlasuunut unammillernarluni, ajoraluartumillu tamanna piviusuusoq nassuerutigisariaqarparput, Vivian Motzfeldt tusagassiortunik katersortitsinermi oqarpoq.

Tyskland najuunneruniartoq

Sakkutooqarnikkut najuunnitsinnik pitsanngorsaaniarpugut, tyskit illerosnirssamut ministeriata tullersortaa tusagassiortunik katersortitsinermi oqarpoq.

- Kalaallit Nunaata sillimaniarneranut akisussaaffimmik annerusumik tigusinissamut piareersimavugut. Østersøp kisiat ukkatarinera uunngaannaq killeqarpoq. Ataaseq qularnanngilaq: Ruslandip killeqarfii, pisaanilissuit anguniagaat Ukrainemi Østersømiulu uninngavinngillat. Kalaallit Nunaat nunavissuit pingasut naapiffianni inissisimavoq. Inuiannik maanni piumasaqaateqartoqalerusussinnaanera ersarippoq.

- Annerusumik isiginnittariaqarpugut. Tysklandip Issittumut politikkini piviusumut nutaamut siorna naleqqussarpaa. Sakkutooqarnikkut najuunnerput pitsanngorsarallarniarparput, kalaallillu inuit isumannaatsuunissaannut tapersiilluta. Tyskit sakkutuuisa imarsiortuisa aqqartartut, fregat imaanillu nakkutilliissutit timmisartut nutaat takunnissinnaanermut pitsanngorsaanermi qunusaarinermilu atuinnarniarpai, tyskit illersornissamut ministeriata tullersortaa, Dr. Nils Schmid oqarpoq.

Issittumi piginnaasaqarlernissamut isumaqatigiissut 2-mut milliardit

Troels Lund Poulsen issittumi piginnaasaqarlernissamut isumaqatigiissut 2-mut isumaqatigiissutigineqartussamut, ukiarulu saqqummiunneqassangatinneqartumut atatillugu aperineqarpoq, tassanilu Danmark millioninik aningaasaliinissamut piareersimasoq oqaatigaa. 

- Piginnaasaqalernissamut isumaqatigiissutissamut aningaasaliisoqangaatsiassaaq. Danskit koruunii milliardillit eqqartorpagut. Suli isumaqatigiissuteqanngilagut, kisianni Issittumi piginnaasaqarnerulernissaq pisariaqartinneqarpoq. Oktobarip aallartinnerani oqallinnitta naammassinissaa aningaasaliinissarlu anguniarpara.

Saassunneqaraluarutta ilissi (Tyskland aaqq.) qanoq sukkatigisumik kalaallinut inuiaqatigiinnut ikiuiartorsinnaavisi, Sermitsiamit tusagassiortoq aperivoq.

- Kalaallit Nunaat Natop ataaniippoq. Taamaammat qanoq sukkatigisumik ikiuiartorsinnaanitsinnut tunngassuteqanngilaq, qanorli qunusaarisinnaanersugut.

- Taama iliornitsinni umiarsuarnik Issittumukartitsivugut. Natop illersornissami iligineratigut saassussisinnaanerit qunusaarinikkit najuunnikkullu pinngitsoortinneqarsinnaasut qularutiginngilara, tyskit illersornissamut ministertiata tullersortaa tusagassiortunik katersortitsinermi kingulliulluni oqarpoq.