Suleqatigiikkusussuseqannginneq Asiip isornartorsiorpaa
Namminersorlutik Oqartussat assigiinngitsutigut sipaarniuteqarnissaanut atatillugu Kommuneqarfik Sermersuup borgmesteria Asii Chemnitz Narup taama siunnersuuteqaraluarpoq.
Namminersorlutik Oqartussat kommunilu innuttaasut pitsaanerusumik sullinneqarnissaat anguniarlugu, maannakkutut immikkoorlutik ingerlataat, sulianut piginnaasat, aningaasaqarneq ininillu atuineq eqqarsaatigalugit suleqatigiinneq nutaarliorfigissagaat, borgmesterip siunnersuutigaa. Peqqissutsimulli Naalakkersuisuugallartup Martha Lund Olsenip isuma taanna maajip ulluisa 19-ianni ataatsimeeqatigiittoqarnerani itigartilluinnarpaa:
- Martha Lund Olsenip erseqqilluinnartumik oqaatigaa toqqaannartumik Kommuneqarfik Sermersuup suleqatiginissaa kissaatiginagu, pineqartumilu allannguinissat KANUKOKA aqqutigalugu taamaallaat pissasut, Asii Chemnitz Narup oqarpoq.
Aamma atuaruk Peqqinnissaqarfiup kiffartuussinerata allannguuteqannginnissaa naalakkersuisup sulissutigaa
Suleqatigiissitaq KANUKOKA-mi pilersinneqartussaq Martha Lund Olsenip innersuussutigaa. Suleqatigiissitaliarli taanna suli pilersinneqanngilaq:
- Paasivara Naalakkersuisut ilaatigut Kommuneqarfik Sermersuumik suleqateqarnissaq orniginartinngikkaat. Isumaqarpungalu uggornartuusoq Illoqqortoormiuni innuttaasunik sullissinerup pitsaanerulersinnissaa anguniarlugu suliniut, aningaasanillu sipaarfiusinnaasoq, taamatut siumoorluni oqareerluni itigartinneqarmat, uggornarporlu Naalakkersuisup nutaaliornissamut, eqaallisaanissamut malunnarluartumillu Illoqqortoormiuni innuttaasunut pitsanngorsaatissanut piumassuseqannginnera, Kommuneqarfik Sermersuup borgmesteria Asii Chemnitz Narup oqarpoq.
