Peqqinnissaqarfiup kiffartuussinerata allannguuteqannginnissaa naalakkersuisup sulissutigaa

Aningaasat sipaarniutigineqarniartut 15 millionit koruunit ukiumi naatsorsuiffimmi 2014-imi naatsorsuutini sinneqartoorutinit aaneqassapput, Peqqissutsimullu Naalakkersuisup Martha Lund Olsenip ukioq manna ukiunilu tulliuttuni peqqinnissakkut kiffartuussinerup allannguuteqannginnissaa suliniutiginiarpaa.

Peqqinnissamik sullissisut suleriaasiisa eqaannerulersinnerisigut teknologiillu periarfissarsiullaqqinnerusumik atorneqarneratigut, aningaasartuutikinnerulluni anguniagassatut siunniussaareersut angunissaannut aningaasat amerlanersaat aaniarneqarput.

AAMMA ATUARUK Martha Lund Olsen: Aappaagu aatsaat sipaarniarnerit malugineqassapput

Peqqinnissaqarfiup aningaasaqarneranik misissueqqissaarisoqassaaq

Misissueqqissaarneq aningaasanut inatsisissap isumaqatigiinniutaanissaa sioqqullugu aallartinneqareersumi kiffartuussinermut atatillugu anguniagassatut siunniussat arlallit eqqarsaatigalugit aningaasat qanoq amerlatigisut pisariaqartinneqarnissaat paasiniarneqassasoq Martha Lund Olsenip oqaatigaa:

- Peqqinnissamut Isumaginnittoqarfimmut tunngatillugu amerlanerussuteqarluartunit isumaqatigiissutigineqartumik ukiunilu arlalinni atuuttussamik pitsaasunik qularnaatsunillu toqqammavissiuutigaluni  attartuumik aningaasaqarnikkut ineriartorfiusinnaanissaa anguniagassatut siunnerfiuvoq, Martha Lund Olsen oqarpoq.

AAMMA ATUARUK Illoqqortoormiuni Qaanaami Qasigiannguanilu nakorsatut atorfiit ataannassapput