Illoqqortoormiuni Qaanaami Qasigiannguanilu nakorsatut atorfiit ataannassapput
Pisortanut missingersuutini ukiuni tulliuttuni sisamani atuuttusami 50 million kr- ik sipaaruteqarnissamik Naalakkersuisut saqqummiussaani illoqarfinni pingasuni pineqartuni nakorsatut atorfiit atorunnaarsinneqarnissaat siunnersuutigineqartunut ilaavoq.
Nakorsatut atorfik Ittoqqortoormiuni atorunnaarsinneqarpat tamanna akisussaassuseqanngitsuliornerussasoq, Kommuneqarfik Sermersuumi borgmesteri Asii Chemnitz Narup oqarpoq.
Siunnersuut ernumalersitsisoq
Illoqqortoormiuni borgmesteriusimasup Erling Madsenip nakorsatut atorfik atorunnaarsinneqarpat illoqarfimmut ajortumik kinguneqarnissaa ernumassutigaa.
Atassut sinnerlugu Qaasuitsup kommuniani Kommunalbestyrelseimut ilaasortap Masauna Pearyp sipaarniartoqarnera inuup inuuneranik naleqarnissaa ernumassutigaa.
Avinngarusimasuni nakorsatut atorfiit sipaarfiginiarneqarnerannut isornartorsiusiusut ikinngillat.
Maanna Peqqissutsimut Naalakkersuisoq Martha Lund Olsen oqarpoq siunnersuutigineqartoq tunuartinneqartoq.
- Siunnersuutigineqartoq akerlerineqarpoq annertuumik, minnerunngitsumik tunualiaqutikka annertuumik akerliupput taamaattumik sipaarutissat allami nassaarissavagut, taamaattumik innersuussutigisarput tunuartipparput, Peqqissutsimut Naalakkersuisoq Martha Lund Olsen oqarpoq.
Tassuma erseqqissaatigaa illoqarfinni pingasuni pineqartuni nakorsanik atorfinitsitsiniartarneq ajornakusoortartoq siunnersuutigineqartorlu maanna tunuartinneqartoq 2017-mi atuutilersussasut pilersaarutaasimagaluartoq.
Illuatungiliuttut iluarisimaarinnittut
Siunnersuutigineqartoq 2010mi peqqissutsimut Naalakkersuisuusimasup Agathe Fontainip IA-meersut siunnersuutigigaa, Martha Lund Olsen oqarpoq.
Taamatut siunnersuuteqarsimanani Agathe Fontain oqarpoq.
Siunnersuutip tunuartinneqarneranut aalajangerneq Inuit Ataqatigiit Inatsisartuni oqaaseqartittagaannit Naaja Nathanielsenimit iluarisimaarneqarpoq
Aningaasat sipaarutigineqartussat siorna aningaasat atunngisat nuunneqarnerisigut aaqqinneqarumaartoq Martha Lund Olsen oqarpoq.
Aningaasanut inatsimmi 2061-mit 2018-mut atuuttussanut sipaarutigineqarsinnaasut allat misissuiffiginiarlugit Martha Lund Olsen oqarpoq.
