Politiit ullormut nalunaarusiaat: Tillinniartoqarlunilu tillinniariaraluartoqarpoq
Nuup qiterpasissuani Akikimi neriniartarfimmilu Siam Orchidimi pingasunngornermut unnuaani tillinniariaraluartoqartoq, Kalaallit Nunaanni Politiit pingasunngornermi ullaakkut ilisimatitsipput.
Siullermik Akikimi tillinniaqarneranik pingasunngornermut unnuaani pingasunut qiteqqunnerata missaani aappassaanillu Nuukullammi neriniartarfimmi Siam Orchidimi aamma tillinniaqarneranik tallimanut tanneq pingasunngortoq kalerrisaarisoqarpoq.
- Akikimi tillinniariaraluit tunuatigut matukkut iseriaraluarsimapput, neriniartarfimmilu Siam Orchidimi tillinniariaraluit matumik igalaanillu aserorteralutik iseriaraluarsimapput, politiit pigaartuisa ittuat Malik Olesen oqarpoq.
Pisut marluk taakku akornanni atisaarniarfimmi Viannemi Nuup aamma qiterpasissuaniittuusumi tillinniartoqarpoq.
- Atisaarniarfik Viannemiittoqarsimaneranik takussutissaqarpoq, tassanili qanorpiaq pisoqarsimanersoq suli paasinngilarput, politiit pigaartuisa ittuat oqarpoq.
Aallartiffissaqanngitsut
Politiit pisut pingasut taakku pillugit suliani tamani aallartiffissaqarpiaavinnginnamik pasisaqanngillat, tillittoqarsimanersorli nakkutilliissummik videoliami takussavaat. Politiilli suli misissuigamik suliaq taanna pillugu oqaaseqarusunngikkallarput.
- Tillinniariaraluartoqarsimasoq tillinniartoqarsimasorlu massakkorpiaq oqaatigisinnaavarput, sulianilu taakkunani aallartiffissaqarpiaavinnginnatta inuttaasut takunnissimasutut ilisimanittutulluunniit paasissutissaatillit attaveqaqqunaqaat, Malik Olesen oqarpoq.
Kalaallit Nunaanni Politiit misissuineranni iluaqutaasinnaasunik paasissutissaateqaruit 70 14 48-mut sianerfigalugit attavigisinnaavatit.
Nuummi pisut pingasut taakku saniatigut allanik ulapputeqarsimanatik, politiit ilisimatitsipput.