VIDEO Martha Lund Olsen: Aappaagu aatsaat sipaarniarnerit malugineqassapput
Isorliunerusut peqqinnissaqarfimmi sipaarniartoqarnissaannut ernumapput. Peqqissutsimut naalakkersuisoqarfik 15,3 millionit koruuninik ukiormanna sipaaruteqarfigineqassasoq aningaasanut inatsisissami allassimavoq. Peqqinnissaqarfimmi allaffissornermi, taamatullu nakorsiartarfimmi nakorsiartarfeeqqanullu matoqqasitsinerulernissat isorliunerusunit ernummassutaalereertut Qanoruumi ippassaq saqqummiunneqarpoq.
Aamma atuaruk Illoqqortoormiuni Qaanaami Qasigiannguanilu nakorsatut atorfiit ataannassapput
Ukiormannalu sipaarniarnerit aallartissanngillat, peqqissutsimut naalakkersuisoq oqarpoq, siornami aningaasat atorneqanngitsoortut ukiormannamut nuunneqarmata sipaarniarnissat ukiormanna eqquissanngillat.
Martha Lund Olsenip KNR-mut oqaluttuaraa, naalakkersuisoqarfimmi suut pitsanngorsaataasinnaanersut aamma naalakkersuisoqarfiup utaqqisut qanoq ikilisissinnaaneraat kukkunersiuisut Deloittekkut naalakkersuisunut nalilersuillutik misissussagaat.
- Massakkuugallartoq sipaarutissat ernumanartutut isikkoqanngillat, aappaagussamut misissuisoqareerpat aatsaat oqarsinnaassaagut sutigununa inuinnarnut annernarsinnaasut, Martha Lund Olsen oqarpoq.
