Atassut: Naalakkersuisooqatigiit akileraarutinik oqilisaassinerat qineqqusaarutaavoq

Naalakkersusiut akileraartarnikkut aaqqissuusseqqinnerat "Nunarput najoruminarnerulersitsigu"-mik qulequtserneqarpoq. Anguniagaq assortoruminaappoq.

Taamaattorli Inatsisartuni partiit sinnerisa aaqqissuusseqqinneq taperserumanngilaat.  Illuatungiliuttummi tamarmik isumaqarput aaqqissuusseqqinnerup aningaasaliivigineqarnera naammanngitsoq, pisortaqarfiullu akissaqartinngisaminik aningaasartorniarneranik ajornartorsiut aaqqinniarneqanngitsoq. 

Atassut sakkortuumik isornartorsiuivoq. 

Isumaqatigiissutip naammassineqarnerani illuatungiliuttut ilaanissaat Naalakkersuisunit soqutigineqarsimanngitsoq partii isumaqarpoq. Illuatungiliuttut isumaqatigiinniarnerni ilaajunnaarnerata kingorna akileraartarnermik oqilisaassinerit annertusineqarsimanerarlugit, Atassup siulittaasua Aqqalu Jeremiasen tusagassiutinut nalunaarummi allappoq. 

Taamaalillunillu inuppassuit aappaagumiit qaammammut 1.000 koruunit angullugit akileraarnikinnerulernissaannut angusaqarnermut ataqqinaat Naalakkersuisut kisimiillutik angusinnaavaat. 

- Aallaqqaammut isumalluarnikuugaluaqaagut Atassummiit, akisussaaffimmillu tigusinnginnertut atorluarneqaannarpoq naalakkersuisuniit, uagut akisussaaffimmik tigusinngitsutut naliliinnartussanngorluta, Aqqalu Jeremiassen KNR-imut oqarpoq. 

Taassumalu taama oqarnera, Aningaasaqarnermut Akileraartarnermullu Naalakkersuisup Erik Jensenip ilisarisinnaanngilaa: 

- Tusarnaaqqissaarsimavagut immersueqataanissaanullu aamma periarfissittuartarsimavagut.  Naggataatigullu uanga naalakkersuisutut inaarutaasumik naammassiniarnerani piumasaqarsimavunga aningaasalersuutissanik qulakkeerinneqataanissamut peqataanissaat siunnersuuteqarnissaallu kissaatigisimallugu. Taannalu tikikkatsigu Atassut pissippoq, Erik Jensen oqarpoq. 

Sodavandinut akitsuutit aningaasaliissutaassapput

Akileraartarnermik aqqissuusseqqinneq januaarip aallaqqaataani 2025-mi atuutilissaaq. Tamannlu nalaatsornerinnaanngitsoq Atassut isumaqarpoq. Qinersinissammi tulliata suaarutiginissaa qaannatialunnik sioqqullugu, akileraarutinik oqilisaassineq naalakkersuisooqatigiinnut illuaqutaaginnartussatut isigineqarsimassaaq. 

Aqqissuusseqqinnerup aningaasalersorneqarnera partiip aamma isoraa. 

- Pisiffimmut Brugsenimulluunniit sodavandisiniaruma taava 2,90 koruuninik puiaasaaqqamut ataatsimut puukunut akitsuummik akiliissaanga. Aningaasallu taakku sulinermut ilanngaatip qaffaneratigut innuttaasunut utertinneqassapput. Kaasarfimmiit kaasarfimmut allamut nuussinertut taaneqarsinnaavoq, Atassutip siulittaasua oqarpoq. 

Naleqqap Demokraatillu siulittaasui, Pele Broberg (N) aamma Jens-Frederik Nielsen (D) aamma taama isornartorsiuipput. Aningaaanik kaasarfimmiit kaasarfimmut allammut nuussinerinnaasoq, taakku KNR-imut oqaatigaat. 

Suliffeqarnermut akitsuutip 1 procentimik qaffanneratigut aaqqissuusseqqinneq ilaatigut Naalakkersusunit aningaasalerniarneqarpoq. Akitsuut taanna kalaallit suliffeqarfiutaanit akilerneqassaaq. 

Aningaasat nassaarineqarnissaat Naalakkersuisut qulakkeersinnaanngilaat

Akileraarnermi oqalisaassinerup matussuserniarnerani akileraarutit kisimik naatsorsuutigneqanngillat. 

PIsortaqarfinni aaqqissuusseqqinnikkut suleriutsinillu pitsanngorsaanikkut 240 millionit koruunit nassaarineqarnissaat Nalaakkersuisut ilimagaat. 

Akileraartarnermik aaqqissuusseqqinnerup 360 millionit koruuneqartussap, pingajorarterutaat sinnerlugit taamatut matussuserniarneqarput. 

Tamannali Atassummi isumallualersitsinngilaq: 

- Aaqqissuusseqqinnerimmi iluatsinngippata? Naalakkersuisut nipittartuliipput. Aningaasat isertinneqarnissaat qulakkeerneqanngilaq, Aqqalu Jeremiassen oqarpoq. 

Nunami suliffeqarfiit akitsuusersornagit sipaarniarnerillu qularnartut naatsorsuutiginagit, inuiaqatigiinni ineriartornerup annertusarnissaa sammineqarnerusariaqartoq Atassutip siulittaasua tikkuaavoq. 
Aaqqissuusseqqinnermilu akisussaasoq Erik Jensen isumakulunngilaq: 

 - Unalu pitsaanngitsutut oqariartornerat uggorivara tassunga sammitinniarneqassapat,  pissutigalugu piviusuunngimmat. Taamaattumik aningaasalersuutissanut tunngasut tamaavimmik qulakkeerniarneqartillugit naammassiniarneqarnissaat pingaarnerpaajusimavoq. Tunngaviusumik isumaqatigivara aningaasat kaaviaartinneqartut nunatsinni nutaanillu isaatitsissutissanik eqqartuinissarput pingaarnerusariaqalersoq, Aningaasaqarnermut Akileraartarnermullu Naalakkersuisoq taama oqarpoq. 

Akileraartarnermik aaqqissuusseqinnerup 2025-mi atuutilinnginnerani aningaasaliissutissat tamakkerlugit nassaarineqarumaartut, Naalakkersuisut isumaqatigissutaani allassimavoq.