Nuuk Imerup illorsua pisiarineqartoq
Nuuk Imeq immiaaqqanik sodavandinillu ukiuni 40-ngajanni maqitsisareerluni siorna decembarip 29-ni matuvoq.
Illorsuarlu ulloq manna tikillugu atorneqanngilaq – allanngortoqalerporli.
”Assartukkanik anginerusunik tigusisinnaajumalluta, sullissilluarnerujumalluta aamma assartugassanik amerlanerusunik uninngatitaqarsinnaajumalluta illorsuaq pisiaraarput”, Blue Water Greenlandip nunatsinni immikkoortortaqarfiata pisortaa, Lars Vajse, Blue Water Shippingip tusagassiorfinnut ullaaq nalunaarutaani oqarpoq.
Suliffeqarfik ineriartortoq
Nassiussalerinermik suliffeqarfiup maqitsiviusimasup illorsua 100 millionit koruunit sinnilerlugu pisiaraa.
North Atlantic Bluewaterimi pisortap tullersortaa Ole Ulriksen ima oqarpoq:
- Blue Water nunap periarfissagissaarneranik upperinnikkami aningaasaliivoq aamma Kalaallit Nunaata ineriartorneranut tapersiineruvoq, nunallu nutaamik attaveqaasersorneqarnera piviusunngulermat piareersarnerulluni, taanna oqarpoq.
Nuummi maqitsiviusimasup illorsua ukiaru aatsaat atorneqaqqilissaaq.
Illorsuaq Blue Waterimit oktobarip aallaqqaataami pigineqalissaaq, taassumalu kingorna atorneqaqqilernissaanut piareersarlugu iluarsartuunneqangaatsiarlunilu nutarterneqassaaq.
