ICC: Kalaallit Nunaata novemberip arfineq aappaani erfalasoq amusariaqarpaa
7. november tassaavoq Inuit Day. 2006-imili tamanna ICC-iip aalajangiummaguli taamaalerpoq.
Taamaakkaluartorli nunatsinni ullup nallisineqartarnera Kalaallit Nunaanni ICC-miit naammagisimaarneqanngilaq. Eqqornerusumik: ullu nalliussineqarneq ajormat naammaginnilaat.
Tusagassiuutinut nalunaarummi ICC Kalaallit Nunaat taama allappoq.
Alaskami, Canadami Chukotkamilu ullu malunnartinniarneqartarpoq. Taamaattumik ICC Kalaallit siumaqarpoq Kalaallit Nunaani tamarmi pisortatigoortumik ullu nalliussineqartariaqartoq, ullunullu pisortatigoortumik erfalasulerfiusunut ullup ilanngunnissaa Nqalakkersuisunut kaammattuutiigalugu
-Kalaallit Nunaanni ullorpassuit ukiup ingerlanerani nalliussisarpavut, sorlu aamma ullut kinaassutsitsinnut tunngavallaanngikkaluartut, Hjalmar Dahl, ICC Kalaallit Nunaanni præsidentiusoq oqarpoq.
-Inuit Day tassaavoq naggueqatigiit Inuit ukiuni tuusintilikkaani issittumi najugaqarsimannerannik nalliussisarneq, ukiullu ingerlaneranni naalagaaffiit killeqarfilersuisimanerisa kingorna avissaartitsigaluartut maanna killeqarfiit pitarlugit ataatsimoorfinngortoq.
Novemberip arfineq aappaa Inuit Day-tut ICC-iip suaarutigimmagu ICC-mi ataatsimeerusartut naalakkersuisut oqartussallu ullup tulluuttunik nalliussineqartarnissaa aaqqissuussaasunillu iliuuseqartarnissaa kaammattuutigaa.
- ICC Kalaallit Nunaata naalakkersuisut kommunillu siunissami novemberip arfineq aappaanni Inuit Day nalliussisalissagaat kaammattuutigaat, soorlu nunani allani naggueqatigiit inuit nunaanni nalliussineqartartoq, taamaattumik ullup erfalasulerfittut pisortatigoortumik nalunaarutigineqarnissaa soorlu Nordens Dag aamma Vestnordisk Dag taamak nalliussineqartartut Hjalmar Dahl oqarpoq.
Issittumi siallutik naggueqatigiit Inuit 180.000 missaaniittut ICC-miit sinnersorneqarput.
