Nunatta erngup nukissiorfittaassaanut Danmarki atukkiivoq

Nuummi aalaakkaasumik kallerup inneqarnissaa qulakkeerniarlugu nunatta milliardilikkaanik atornissaa qulakkeernissaanut qallunaat naalagaaffiat piareersimavoq.

Danmarkimi Aningaasaqarnermut naalakkersuisoqarfik Inatsiseqarnermillu naalakkersuisoqarfik tusagassiuutinut nalunnaarumminni taama allapput.

Suliffeqarfik NunaGreen Construction A/S sanaartornermut akisussaasuussapput.

Taamaalisoqassappalli suliffeqarfik 3 milliardit missaliorlugit koruuninik atorniartariaqarpoq. Taakku 95 procentiisa naligi Danmarkip atukkiukkusuppai.

Allatut nassuiassagaanni, suliffeqarfiup atukkani siunissami akilersinnaassanngippagit, akiligassap annerpaartaa Danmarkimut tussaaq.

Aningaasaqarnermut akileraartarnarmullu naalakkersuisup, Erik Jensenip (S), isumaqatigiissut isumalluarnaraa.

- Naalagaaffimmit qularnaveeqqut, suliap aningaasaqarnikkut patajaatsumik taarsigassarsilluni piviusunngortinnissaanut pingaaruteqarpoq. Tamanna nunatta minguinnerulernissaanut alloriarneruvoq pingaarutilik, Naalakkersuisullu mingutsitsinngitsumik nukissiornerulernissamut anguniagaannut ikorfartuissalluni.

NunaGreen Construction A/S atukkiuffigineqaannginnerani qallunaat naalagaaffeqatigiivisa piumasaqaatanik iliortoqaqqaassaaq.

Utoqqarmiut Kangerluarsunnguani sanaartornissaq pillugu misissueqqissaarneq, avatangiisinut akuersineq pilersaarusiallu naatsorsorneqarneralu siunnersuisumit avataaneersumit nalilersorneqaqqaassasut, tusagassiuutinut nalunaarummi allassimavoq.

Nukissiorfiit erngumik nukissiorfik siunissami akisussaaffigilissavaat

Utoqqarmiut Kangerluarsunnguani illoqarfik pingaarnermut kallerup inneranik tunioraasumik peqareerpoq.

Nuummut noorartut malitsigalugit Nuummi innuttaasut amerliartorput, kallerup inneranillu annertunerusumik pisariaqartitsisoqaleraluttuinnarpoq.

Utoqqarmiut Kangerluarsunnguani erngup nukinganik nukissiorfik 1993-imili atorneqartoq 45 MW tikillugu ingerlatitsisinnaavoq.

Sanaartorneq 2026-mit 2032-p tungaanut ingerlanneqarsinnaanerussammat atukkiussisoqarnissaa iluatsissasoq naalakkersuisut naatsorsuutigaat.

Sanaartornerlu naammassippat Nukissiorfiit erngup nukinganik nukissiorfik akisussaaffigilissavaa.

Nukissiorfimmut atuisut aalajangersakkamik akileraarutigisartagaat NunaGreen Constructionimullu atukkiinermi aningaasartuutit tamarmik matussuserneqassasut pilersaarusiami allaqqavoq.

Qasigiannguani Aasiannilu nunap ernganik nukissiorfeqarnissaa, Inatsisartut 2021-mi aalajangernikuuaat.

Qaquguli piviusunngussanersoq suli qulakkeerneqanngilaq. Qeqertarsuullu tunuani pilersaarusianut qallunaat naalagaaffiat tapiinissaminut ammasoq, naalakkersuisut qallunaallu naalakkersuisuisa, tusagassiuutinut nalunaarumminni allappaat.