Nuummut, Aasiannut Qasigiannguanullu erngup nukinganik pilersuineq annertusissaaq

Tamanut atuuttumik innaallagissamik pilersuineq ukiuni tulliuttuni mingutsitsinngitsumik ineriartortinneqarnerulissaaq.

Tassami Inatsisartuni amerlanerussuteqartut Nuummi erngup nukissiorfiata allilerneqarnissa nutaamillu Aasiannut Qasigiannguanullu pilersuisussamik sananissaq siunnersuutip pungajussaarneqarnerani akuersissutigaat.

Erngup nukissiorfii naammassippata Nukissiorfiit mingutsitsinngitsumik nukissiamik pilersuinera 70%-imiit 90%-imut qaffassaaq.

AAMMA ATUARUK Nunatsinni nukissiuutinut atuinerup 80 procentiata missaa mingutsitsisuusoq

Akuersissutigineqarnerani sanaartornissamut aningaasartuutissat 3,1 mia. missaaniittut nassaariniarneqassapput. Aningaasat taakku Naalakkersuisunit suli inissinneqanngillat.

Naalakkersuisut aningaasanut inatsisissata saqqummiunnerani Aningaasaqarnermut Naalakkersuisoq Asii Chemnitz Narup taama ilisimatitsivoq.

Kalaallit Nunaata nukissiamik atuinerata 80%-ia suli mingutsitsisuuvoq

Nunap mingutsitsinngitsumik nukissiamik atuinera pilersaarusiat annertusissagaluarpaguluunniit, tamakkiisumik nukissiutinik mingutsitsinngitsumik atuilernissap tungaanut suli aqqut takivoq.

Nunap nukissiutinik atuineranik naatsorsuinerit kingulliit malillugit 82,6%-imik dieseli, benziina Uulialu nukissiuutigineqarput. 

AAMMA ATUARUK Naatitanik naatitsisartoq Ilulissani naatsiivittaarusuttoq

Peqqutaaqataasut ilagaat suliffissuit sinerissamilu inoqarfiit arlalippassuit orsussanik atuisuummata.

Nunatsinni angallassinermi soorlu Royal Arctic Linep umiarsuaataat Air Greenlandillu timmisartuutaat aamma orsussanik atuisuummata. 

Biilit umiatsiallu nunatsinni nukissiutinik atuineranik naatsorsuinermi aamma ilaapput. 

Naalakkersuisuusimasumit isumassarsiarineqartoq

Naalakkersuisuusimasumit suliaq aallarnisarneqarpoq, Nuummilu erngup nukinganik nukissiuteqarnerup ilaneqarnissaanut politikerit aningaasaliinissaat Nukissiorfimmiit qangali piareersimaffigineqareerpoq.

Ukiummi arlaqanngitsut qaangiuppata, illoqarfimmi tassani innaallagiassaaleqisoqalersinnaasoq, taamaasillunilu illoqarfimmi innaallagissamik pisariaqarfiuleqqasussami orsussanik uuliamik atuinerulertoqarsinnaavoq.