Naatitanik naatitsisartoq Ilulissani naatsiivittaarusuttoq

Icebergsalaati Ilulissaneersoq. Iluliarsuit illoqarfianit. Tamanna aappaagumiit piviusunngorsinnaavoq.
Greenlandic Greenhouse naatitanik illup iluani naatitsinermini qulliit LED-lys-it atortarpai. Naatitat taamaalilluni ukioq kaajallallugu naatinneqarsinnaasarput.
Allattoq Kathrine Kruse
novembarip 06-at 2021 11:30

Greenlandic Greenhouse, Nuummi naatitanut naatsitsiveqartoq, Ilulissani aamma naatsiivittaarusuppoq.

Taama Greenlandic Greenhousemi piginneqataasoq, Nicklas Birkely, KNR-imut oqaluttuarpoq.

- Amerlanerit nalugunanngisaattut Nuummeereerpugut. Aamma Ilulissanut naatitanik sisamanngorit tamaasa nassiussisarpugut. Ilaatigut, oqarpoq.

Tonsi sinnerlugu qaammammut naatittaraat

Greenlandic Greenhouse naatitanik 1,3 imaluuniit 1,4 tonsit angullugit qaammammut naatitsisarpoq. Salaatinit naasunut mamarsaatissanut. Naatitat suliffeqarfiup Nunatsinni sumiiffinni assigiinngitsuni pisisartuinut nassiunneqartarput.

- Aamma jordbærit, tomatit, agurkillu naatittalertussaavagut, Nicklas Birkely, piginneqatinilu allat Nuummi naatitsisarfimminnik allilerileruttortut, taama oqarpoq.

AAMMA ATUARUK Inuussutissanik tunisassiortut nersornaammut innersuunneqartut

- Taamaalilluta Nuummi aappaagumiit annertunerusumik tunisassiulertussaavugut. Allilerinerpullu naammassippat Greenlandic Greenhousemeersut Ilulissiassapput. Ilimanarpoq februaarimi imaluunniit marsimi, oqarpoq nangillunilu:

- Maanna sapaatip akunneranut 43-nik pisisartoqarpugut. Ilulissanut, Sisimiunut, Uummannamut, Kangerlussuarmut aamma Maniitsumut nassiussisarpugut. Aamma Kujataanut nassiussuilernissarput aallartisarujoorparput.

Illoqarfinni anginerni aamma pilersitserusupput

Nicklas Birkely oqaluttuarpoq suliffeqarfimmit anguniagaajuarsimasoq illoqarfinni anginerni naatitsivinnik ammaanissaq.

- Siunertariuarnikuuvarput Kalaallit Nunaanni tamarmi, Nuummiinnaanngitsoq, suliffinnik pilersitsinissarput. Aamma attanneqarsinnaasutut suliffeqarfiunissarput. Attanneqarsinnaasunik tunisassiorusulluta illoqarfinni anginerni naatitsisarusuppugut, taamaalilluta nassiussuisarunnaassagatta. Tamanna aallaqqaataaniilli pilersaarutaanikuuvoq.

Greenlandic Greenhouse sisamanik piginnitseqarpoq tamakkiisumik sulisartunik. Suliffeqarfillu piffissami qaninnermi marlunnik sulisortaarniarpoq.

- Illoqarfiit allat uagut ukkatarerusukkatsigit, taamaalilluni Nuummi suliarisartakkagut allat aallutilissavaat, Nicklas Birkely oqarpoq.

Greenlandic Greenhouse Nunat Avannarliit Siunnersuisoqatigiivisa avatangiisinut tunngasuni nersornaasiuttagaanut nersornaaserneqartussatut innersuunneqartut ukioq manna ilagaat.

Aamma atuaruk