Inuussutissanik tunisassiortut nersornaammut innersuunneqartut
Naatitat naasullu mamarsaatissat Greenlandic Greenhouse-imeersut pisiniarfinni pisiarineqarsinnaasut Nuummiut amerlasuut nalunngilaat, Greenlandic Greenhouselli Nuummiit tunisassiai nunani avannarlerni maanna aamma ilisimaneqalersimapput.
Greenlandic Greenhousemi Nunat Avannarliit Siunnersuisoqatigiiffiata avatangiisinut tunngasuni nersornaasiuttagaanut innersuunneqarpoq. Nersornaat Nunani Avannarlerni suliniaqatigiiffimmut suliffmmulluunniit avatangiisinik mianerinnilluni suliniuteqarsimasumut tunniunneqartarpoq.
Nersornaammullu innersuunneqarneq Greenlandic Greenhousep nuannaarutigaa:
- Sulerulussimanitta nersorniarneqarnera uagutsinnut isumaqartorujussuuvoq. Tamatta suliarput tulluusimaarutigeqaarput, Greenlandic Greenhousemik piginneqataasoq Nicklas Birkely oqarpoq.
Naasut mamarsaatissat assersuutigalugulu salatit Greenlandic Greenhousep tunisassiarisarpai, kisianni jordbærit, agurkit, tomatit pupiillu siunissami aamma tunisassiarilissallugit pilersaarutigaat.
Avataanit eqqussuineq ajorsartinneqassasoq
Greenlandic Greenhouse, avatangiisinik mianerinnillutik, silallu pissusiata allanngoriartornerata akiorniarneqarneranut iluaqutaasumik tunisassiorsinnaanertik takutippaat, Kalaallit Nunaannilu piujuaannartitsineq aallaavigalugu inuussutissanik tunisassiortoqarsinnaaneranik takutitsillutik. Nunat Avannarliit Siunnersuisoqatigiiffiata Greenlandic Greenhousep nersornaaserneqarnissaanut innersuussinerminni taama ilaatigut tunngavilersuipput.
Nersornaat 300.000 koruuninik aningaasartaqarpoq, nersornaaserneqassagunillu aningaasat naatitanik amerlanerusunik tunisassiulersinnaanissamut Greenlandic Greenhousep atorniarpai.
Nersornaaserneqartussaq Nunani Avannarlerni Siunnersuisoqatigiit Københavnimi ukioq manna novembarip ulluisa aappaanni ataatsimiinneranni saqqummiunneqarumaarpoq.