Sulorarnermi nunanut allanut unammisartut nunani tamalaani angusarissaartut

Kalaallit nunanut allanut unammisartut qungujulaarluarput unammersuarneq Small States Cypernimi sapaammi ullaap tungaa naammassimmat sølvinik ujaminnakkamik.

Sulorarnermi nunanut allanut unammisartut Island Gamesip avataatigut unamminerni aatsaat taama angusarisaartigipput.

Unammersuarni arlaliulluni iligiikkaarluni unammineruvoq nunat akunnerini unamminerit tallimaasarlutik. Kalaallit puljeminni ajugaasuugamik finalemut anngunniuttunut ingerlaqqillutik Cypern aamma Island unammivaat.

- Cypern siorna Small Statesimi ajugaasoq ajugaaffigaarput Islandimulli ajorsarluta, nuna tamakkerlugu sungiusaasoq Rune Svenningsen KNR-mut oqarpoq.

- Ukiut arlallit suliniuteqareerluta tamaanga ullumikkut killippugut sølvinnallutalu, oqaatsini ilavai.

OL-qataasoq ajugaaffigaat

Islandimiut pikkorinnerupput kultinnanniullunilu unamminermi 4-1-mik ajugaallutik.

Unammersuarnerli ataatsimut tamaat isigalugu nunanut allanut unammisartut naammagisimaarinnipput.

- Uani sapaatip akunnerani angusat aallaavigissagaanni pitsaasumik ingerlavugut. Unammisavut siornatigut allornermik affarmik uatsinniit siuarsimanerulaarput. Assersuutigaluguli angutit iligiiaarneranni unammisartuutitta OL-mut peqataareersoq ajorsartippaat. Taamaattumik pikkorissut ajugaaffigaavut, Rune Svenningsen oqarpoq.

Unammisartut ilaat ataasiakkaarluni nunani tamalaani ukiuunerani unammisassapput. Arlaliullunili iligiiaarnermi unammineq tulleq aappaagu julimi Island Gamesimi pissaaq.