Aqqalu Lukassen inuusuttuaqqani nunarsuarmi nukittunerpaanngorniuteqataassaaq

Novemberip 30-at inuusuttuaqqani nunarsuarmi nukittunerpaanngortoqassaaq unammersuarneq World Strongest Teen naammassippat. Peqataasusat akornanniissaaq Aqqalu Lukassen Ilulissaneersoq kivitseriaatsini arlalinni ukiut kingulliit siuariartorluartoq.

Maanna tassa World Strongest Teenimi peqataasussanngorpoq piginnaasatigut killiffia peqataanissamut piumasaqaataasunik naammassinniffiummat.

- Peqataasussanngornera tupaallannarpoq tassanngaannalaarmat, Aqqalu Lukassen KNR-mut oqarpoq.

Aqqalu Lukassenip sungiusarneraniit videonik nassiussisoqarpoq aamma kivittaarinerni assigiinngitsuni oqimaannerpaanik kivissimasaasa allassimaffii nassiunneqarlutik.

- Tamanna angunniarlugu assut sungiusarnikuuvunga. Sungiusartorujuuvunga sapaatip akunneranut marloriaannarlunga sungiusanngiffeqartarlunga, Aqqalu Lukassen oqaluttuarpoq.

Angusarissaarnissamut ilimasuttoq

Maanna tassa inuusuttuaqqat nukittoorsuit nunanit tamalaaneersut unammisussanngorpai.

- Unamminermi angusarissaarsinnaanera ilimagaara. Ilimasuppunga angusarissaarnerit akornanniissinnaallunga, Aqqalu Lukassen oqarpoq.

Unammeriaatsit arlallit aqqusaarneqassapput. Arlaqartut Aqqalu Lukassenip misilereerpai soorlu dødløft, taamaattorli ujarassuarnik kivitsineq aatsaat misilissavaa.

- Peqataanissara tassanngaannalaarami maannalu ullut 30-it ataallugit piffissarilerlugu. Sapaatip akunnerali sioqqullugu Danmarkiliassuugut. Tassa misilissimanngisakka sungiusarumaarpakka, Aqqalu Lukassen oqarpoq.

Dødløftimut piareersimalluarnerarpoq tassani 280 kilo kivittaarlugu kivitsinerit amerlaneqqusaatissagamikkit.

- Qiterlulaarnikuugama kisianni dødløftimi sungiusarnera aallarteqqippara, Aqqalu Lukassen oqarpoq.