B-67 pokalinnanniunnermi ajugaavoq

- Futsal nuannarigukku aajuna unammineq isiginnaagassat.

Oqaatsit taakku aninneqarput IT-79ip sungiusaasuujutigaluni arsartuani Malik Mikaelsenimit illup iluani arsaannermi futsalimi pokalinnanniulluni unamminermi Super Cupimin finalemi sapaammi unnukkut mumittoqarnerani.

Nuummi timersortarfissuarmi Inussivimmi angerlarsimaffippassuarnilu KNR-TV-mi isiginnaartorpassuaqarluni unammisaqattaarneq naammassivoq.

Finalemi unammipput B-67 Nuummeersoq aamma Nagdlúnguak Ilulissaniit. Taakku arfininngormat aamma unammipput. Tassani B-67 9-0-mik ajugaavoq. Finalemili unammillerneqalaavipput.

- Nagdlúnguak ineriartortuaannarpoq allanut unammisaqattaarnissamut uatsinniit periarfissakinnerugaluarlutik, B-67-mi sungiusaasuujutigaluni arsartoq Patrick Frederiksen finale naammassimmat oqarpoq.

Finalemi B-67 7-3-mik ajugaavoq naligiingaatsiareerlutik unamminerup naalernerani siuarluarlutik.

Inuusuttut siuariarput

Patrick Frederiksen aamma misigisimavoq pokalip saniatigut Super Cupimi peqataanertik timersornikkut pissarsiaqarfiusoq. Inuusuttuarartaat tassani takutitsilluaqaat.

- Uatsinnut takutippaat pisinnaalluarlutik. Aamma nuna tamakkerlugu sungiusaasumut takutippaat tunniussaqarsinnaallutik. Sukataarput, akisussaaffimmik tigusipput sapiiserlutillu, Patrick Frederiksen inuusuttuarartatik pillugit oqarpoq.

Finalemi ajugaanngikkaluarlutik Nagdlúnguarmiut aamma misigisimapput Super Cupimi peqataanertik pissarsiaqarfigalugu.

- Nunanut allanut unammisartuni katerikkaagatta siuariarneq misigiuaannarparput aamma taama ippoq pissartanngorniunnermi. Sapaatip akunnerinnaagaluartoq GM-mi siuariarneq aamma misigisarparput, Lars Erik Reimer oqarpoq.

- Super Cupimi siuariaallattutut aamma misigivugut. Taamaattumik ilimagaara GM-rtoqalerpat pitsaassuseq suli qaffasinnerujumaartoq, Lars Erik Reimer oqarpoq.

IT-79 Nuummeersoq pingajuattut inissippoq kingullermillu GM-rtoqarmat sølvinnattut Young Guns Futsal sisamaattut inissillutik.