Futsal: Nuna tamakkerlugu unamminermi nutaami oktoberip naalernerani arsaq isimmeqqaarneqassaaq
Illup iluani arsaannermi futsalimi unammineq nutaaq aallartillugu Nuummi timersortarfissuarmi Inussivimmi ullut quliinnaat qaangiuppata siggartoqarumaarpoq.
Peqataasussat tassaapput B-67, Young Guns Futsal, IT-79 Nuummiit kiisalu Nagdlúnguak Ilulissaniit taakku tassaammata ukioq manna pissartanngorniunnermi kakkannerpaat sisamat akornanniittut.
- Pisortatigoortumik unamminerit amerlanerunissaat qangali kissaatigineqartarpoq. Taamatut kissaateqarneq aallaavigalugu nuna tamakkerlugu pokalinnanniunnissaq pilersaarusiorneqarpoq, KAK-mi allaffissornermi aqutsisoq Ungaaq Abelsen KNR-mut oqarpoq.
Angutit pokalinnanniunnerat aallarniutaassaaq ukiulli tulliuttut inerisarneqarsinnaalluni.
- Misiliutaagallassaaq angutit unammisillugit. Kisianni pilersaarutaavoq arnat inuusuttullu ukiut tulliuttut aamma pokalinnanniuttarnissaat, Ungaaq Abelsen nassuiaavoq.
- Maanna tassa iligiit sisamat kingullermi pissartanngorniunnermi inissilluarnerit unammisinneqassapput, oqarpoq.
Naligiiffiusut
Nunatsinni pissartanngorniunnermi apriilimi pisumi semifinaleni assut naligiittoqarpoq. Semifinalep aappaa sivitsorneqareersoq straffeqattaarnikkut aatsaat ajugaasussarsisoqarpoq.
- Iligiit sisamat peqataasussat assut naligiittarput – ukioq manna kisiat eqqarsaatiginagu aammali siusinnerusukkut pissartanngorniuttarnerni taamaattarput, Ungaaq Abelsen oqaluttuarpoq.
Unamminissat tulleriiaarnerannut tallimanngorneq oktoberip aqqarnat makitsisoqarpoq. Ammaanersiorluni unamminermi kingullermik pissartanngorniuttoqarnerani sølvinnattut Young Guns Futsat Nuummiit aamma Nagdlúnguak Ilulissaneersoq ammaanersiornermi unammissapput.
Unammisaqattaarnerit sisamanngorneq oktoberip 24-aniit sapaat oktoberip 27-ta tungaanut ingerlassapput inissilluarnerillu marluk finalemi unammissallutik.
Unamminerit tamarmik KNR-TV-mi aallakaatinneqassapput.
