Futsal: B-67ip angutitai pissartanngoqqipput
Pissartat pokaliannik B-67 Nuummeersoq kivitseqqippoq nunaqqatitik Young Guns Futsal finalemi arfininngornermi ajugaaffigereerlugit.
Unammersuarnerni B-67 ajorsanngivilluni ingerlaareerluni finalemi 7-1-mik ajugaavoq.
- Angusarput assorujuk tulluusimaarutigaarput. Ukioq arsaaffiusoq aallartimmalli anguniartuaannarnikuuarput pissartanngorniunnermi angusarissaarnissarput ajornanngippallu ajugaanissarput, B-67-mi anføreri Patrick Frederiksen KNR-mut oqarpoq.
Finalemi unammisaat Young Guns Futsal unamminerni aallarniutaasuni unammillerluarput tassani B-67 4-3-mik ajugaalluni unamminerup ilaa kinguaqqareerlutik. Tamanna aallaavigalugu finalemi arsariaasissaq inissinneqarpoq.
- Eqqartorparput nammineq arsariaaserput atorniarlugu immitsinnut illersorluarluta måliniittorput ikiorluarlugu aammalu periarfissavut atorluarniarlugit.
- Isumaqarpunga tamanna iluatsilluartoq immitsinnut illersorluaratta saassussinermilu ulorianaannavilluta, Patrick Frederiksen oqarpoq.
Ajorsaraluarlutik tulluusimaarput
Semifinale pissanganaqisoq straffeqattaarnikkut tallimanngornermi unnukkut naammassisoq aqqusaareerlugu Finalemut anngunneq Young Guns Futsalimut pisoq annertuvoq
- Iligiittut qanoq mikitiginerput eqqarsaatigalugu angusarput tulluusimaarutigeqaarput, Young Guns Futsalimi sungiusaasuullunilu anføreriusoq Aiko Nielsen KNR-mut oqarpoq.
- Arsartorpassuarnik annaasaqarnikuuvugut peqatigiiffittalu ingerlaannarnissaa tamaviaarutigisimallugu. Finalemut anngunnerput amerlasuut tupaallaatiginnguatsiarpaat. Naatsumik oqaatigalugu; maannakkorpiaq tulluusimaarnerpaagunarpunga, Aiko Nielsen oqarpoq.
Nagdlúnguak Ilulissaneersoq bronzennappoq bronzennanniunnermi IT-79 Nuummeersoq ajugaaffigalugu.
Finalemi immikkoortoq siulleq uani takusinnaavat. Immikkoortup aappaa aamma uani takusinnaavat.