Futsal: Aqqalooraq Ejvind Møller-Lund qallunaat nunanut allanut unammisartuinut toqqagaavoq

Aqqalooraq Ejvind Møller-Lund, siornatigut B-67-mi Nuummeersumi unammisartuusoq, qallunaat futsalimi nunanut allanut unammisartuini septemberip naanerani siullerpaamik unammeqataassaaq Danmark Norgelu unammilerpata.

Aqqalooraq Ejvind Møller-Lund kalaallit nunanut allanut unammisartui B-67-milu pikkorilluni ukiut kingulliit arlallit måliniittuusarpoq.

Aasaq nutaanik misileerusulluni nuuppoq maannalu qallunaat pikkorinnerni unammisartuini Hjørring sinnerlugu unammisartuulluni.

Qallunaat nunanut allanut unammisartuini sungiusaasumit Nikolaj Klein Saabyemit qanittumi attavigineqarpoq aperineqarluni qallunaat nunanut allanut unammisartuini peqataarusunnersoq.

- Ikinngutigiittut Norgemut unamminissamut toqqagaavunga tamannalu septemberip naanerani pissaaq, Aqqalooraq Ejvind Møller-Lund KNR-mut oqarpoq.

- Qanigisakka oqaluutereernikuuakka periarfissaq taama ittoq takkutissappat misillugu pissanganartissinnaallugu. Assut nuannerpoq piviusunngortussanngormat tulluusimaarlungalu pissangavunga, Aqqalooraq Ejvind Møller-Lund oqarpoq.

Imminnut ataqqisut

Qallunaat nunanut allanut unammisartuini inissat unammissutaammata arsaattartut sungiusarnerni unamminernilu tamaviaartarput.

- Nunanut allanut unammisartunut måliniittut pingasut toqqagaapput. Måliniittoq ataaseq Hjørringimi unammisartooqatigivara. Taannalu ulluinnarni immitsinnut unammisareerpugut, Aqqalooraq Ejvind Møller-Lund oqarpoq.

- Pissangagilaarpara toqqagaanera allat qanoq tigussaneraat. Qaffasissimili unammisartuusut imminnut ataqqeqatigiittarput, Aqqalooraq Ejvind Møller-Lund oqarpoq.

Arsaannermi unammisartuunini ilinniagaqqarnermik ilaqartippaa taamalu ukiut tulliuttut pingasut missaat Danmarkimi najugaqarnissani naatsorsuutigalugu.

William Ganthorn, siornatigut B-67 Nuummeersoq sinnerlugu unammisartuusoq, siornalu aamma qallunaat nunanut allanut unammisartuiniippoq.