Qatserisartut biilii ukiunik aqqaneq-marlunnik pisoqaavallaartut: - Pissutsit pitsaanerpaanngillat

Aasianni qatserisarfiup isaariaa manngertornivoq, qalipaat katagarnikuuvoq, qisuit allagartallu aserortersimapput.

Naalli aserfallassimagaluartoq, upalungaarsimasut pisortaat, David Løvstrøm allaffimmini issiavoq.

- Akisussaaffeqalernissara takorloornikuunngisaannarpara, taanna nikallungalaarluni tulluusimaarpalullunili oqarpoq.

Upalungaarsimasut assigiinngitsunik ajornartorsiuteqarput: Biilit pisoqaavallaarput, atortorissaarutit amigarput, atorfinitsitsiniarnerlu ilungersunarluni.

David Løvstrømilli sumiiffinni amerlanerpaani inuit naammattut oqaatigai. Kangerlummili innuttaasut amerlassusaat pissutigalugit upalungaarsimasunik eqimattanik piareersimatitsiniarneq ajornakusoorpoq.

- Ikuallattoqassappat imaluunniit allanik ajutoortoqassappat inuit suliaqartissinnaasagut naammapput, amerlanerillu patajaatsuullutik. Nunaqarfiit eqqarsaatigigaanni amerlanerpaartaanni sulisussat tamakkiisuupput, taanna oqarpoq.

Aasianni qatserisarfik kusanarnerunikuuvoq. Assi © : Markus Valentin / KNR

Atortorissaarutilli ajornerupput.

Illutaata saava qiviaraanni aserfallassimaqisoq takuneqarsinnaavoq, kommunilu nutarterinissamut qanoq isilluni akissaqassanersoq, upalungaarsimasut pisortaata takujumiitsippaa.

- Inissisimalluarnerpaajunngillat. Qatserussuaqarnerup taakkua pisoqalisimasut taarserneqarnissaannut piffissaq sivitsulersoq massakkut utaqqivugut.

Qatserisartut biilii pisoqalisut

Upalungaarsimasut qatserisartut biiliinik sapinngisartik tamaat aserfallatsaaliillutillu biililerisartut, David Løvstrøm oqarpoq.

Piffissarli sivitsortillugu biilinut kingoraartissanik pissarsiniartarneq ajornakusoorneruleriartorpoq.

- Ukua qatserussuarnut ukiut 25-it piusinnaaffittut innersuussutigineqartarput ukiunit 25-ninngaanniit pisoqaanerussangitsut taakkualu sapinngisamik malitsikkusunnartarput soorunami. Ukua maani pigisagut ukiut 37-issaat piupput.

- Taamaattumillu piffissami aggersumi neriuutitta ilagivaat aamma nutaanik taarserneqarsinnaajumaartut Aasiaat illoqarfiat alliartorluni aamma isorartuukasinngornikuummat.

David Løvstrømip Kommune Qeqertalimmi nunaqarfinni upalungaarsimasunut Aasianni allattoqarfimminit ataqatigiissaarisarpoq. Assi © : Markus Valentin / KNR

Qatserisartoqarfik soorlu Aasianniittoq qatserisartut biiliinik angisuunik ataatsimik peqakkajuppoq, biilinillu slanginik siaartiterutinik, qatserisartunullu biilinik, qatserisartullu aqutsisuinut biileqartarluni.

Aasianni qatserisartoqarfik qatserisartunngorniat siornatigut ilinniarfiginikuummassuk Namminersorlutik Oqartussat qatserisartunut biilii sillimmatit maanna tigunikuuaat.

Aasianni qatserisartut biilit marluk atorlugit maanna ornigussinnaalerput:

- Piffiulli ilaanni misiginikuuarput illoqarfiup immikkoortortaani assigiinngitsuni marlunni ataatsikkut ikuallattoqarnera taamaalilluni biilersuit qatserinerisa nalaanni qatserussuit aappai ikuallattumut allamut aallartinneqarmata qujanarnikuuvoq marlunnik qatserussuarnik sillimmataateqalernikuugatta.

Nutarterinissamut piffissaq sivisooq

Illoqarfinni sisamani nunqarfinnilu arfineq pingaasuni atortut, ilinniagaqassuseq illersuutillu piumasaqaatasunit ajornerulinginnissaat qatserisartut ullut tamaasa suliarisarpat.

Politikerilli nutarterisoqarnissaanut aningaasaliinialuusaartarnerat kipiluttunartutut aamma isigineqarpoq.

Pingaartumik kommunit 2009-mi aaqqissuuteqqinneqarnerat aningaasatigut inissisimanermik ajornakusoornerulersitsisimasoq David Løvstrøm aamma isumaqarpoq.

Brandstationen i Aasiaat har en nyere, stor brandbil. Men stationen råder også over flere gamle reservebiler, som er 37 år gamle - 12 år ældre end de må være ifølge beredskabschefen. Assi © : Markus Valentin / KNR

Atortut taarserniaasaarneqartarnerat sivisuumillu utaqqisarnersi ilissinnut qanoq ippa?

- Soorunami taanna kipiluttunarsinnaasarpoq kisianni taanna allaqqunneqarsinnaanngilaq qatserisartoqarnerup ingerlatsivigineqarnera aningaasalersorneqarneralu namminersorlutik oqartussaninngaanniit kommuninut akisussaaffigitinneqalermat taanna kommunit immaqa tamarmik amerlanerpaalluunniit aningaasassaqartitsiniarnikkut ajornakusoortumik inissisimaffiginikuuaat.

Eqqaavat sumiiffinni marlunni ikuallattoqarnerani atortut amingarsinnaanerat aammalu sillimmataasut ukiut 30-t sinnerlugit pisoqaassusillit taakkua ajutuussangaluarpata innuttaasunut taanna qanoq sunniuteqassava?

- Innuttaasunut qanoq sunniuteqarsinnaanera uanga nammineq oqaatigiuminaatsippara, kisianni qatserisartutut qatserisartugut maani aalaakkaasut, angisuunik allagartallit qatserussuarnik ingerlatsisinnaasut piumaffigisarpagut ukuninnga pisoqaanerusunik ingerlatsinissamut ilisimannilluartuunngikkaanni atornaveersaarneqassasut.

- Sunaluunniit atortoq pisoqaliartorluni qajannarsiartortarmat, taamaattumik sapinngisamik paarsilluarneq inatsisitigullu piumasaqaataammata ajoquteqalersut piaarnerpaamik iluarsitinneqarnissaat eqqumaffigiinnartarparput.

Inissiarsuarnut marlunnut tunngatillugu aaqqiissuteqarneq

Inissiarsuit pingasut Aasianni Svendborgvejimi sananeqarnikuupput. Kommune Qeqertaliup taakkunannga marluk pigivai. Qatserussuit tummerallit quleriit pingajuannut taamaallaat siornatigut anngussinnaasimapput, quleriilli qulliit maanna anguneqarsinnaalerlutik. Assi © : Markus Valentin / KNR

Aasianni Svendborgvejimi inissiarsuarni nutaani inissiat arlallit suli najugaqarfigineqanngillat.

Quleriinni qullerni inissiat najugaqarfigineqarsinnaasutut akuerineqarsinnaasimanngillat, qatserussuimmi quleriit qullernut anngussinnaasimanngimmata.

Tamannali maanna aaqqiissuteqarfigineqartoq David Løvstrøm oqarpoq.

- Siorna juulimi tummerarsuartaagut tikimmata taakkua qummut qullerpaat qaangerlugit sullisigisinnaasatsinnik tummerarsuartalinnik biilersuaqaleratta aatsaat ammaassinikuuvugut.

- Qatserussuit piniarneqaraangamik aatsaat naqqaninngaanniit sananeqaqqaartarnerat taamaattumillu piffissaq aalajangersimasoq piniarneraninngaanniit pisisumut tunniunneqarnissaanut taanna utaqqineqartarmat taamatut peqquteqarpoq.