Qimmit qimuttut 16-it nappaammik tuniluuttumik toqqussuteqarput
Kuummiuni qimmiaqqat pingasut parvovirusimik tunillatsissimasutut oqartussanit apriilip aallartinnerani pasitsaanneqarput.
Qimmit katillugit 16-it nappaammik tuniluuttumik maanna toqussuteqarsimasut, tallimallu tunillatsissimasutut ersiuteqarnerat pissutigalugu toqunneqartariaqarsimasut, Kalaallit Nunaanni Uumasunut Nakorsaqarfimmit Inuussutissalerinermullu Oqartussaaffimmit nalunaarutigineqarpoq.
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik, tamanna pillugu tusagassiuutinut nalunaaruteqarpoq.
Nappaat parvovirusiusoq oqartussanit suli uppernarsarluarneqarsinnaanngilaq, nappaammulli tuniluuttumut ersiutit aallaavigalugit taamaattuunissaa ilimanarsinnaavoq.
Parvovirusimut ilisarnaataasartut ilaat tassaapput qasoqqaneq, kissarneqarneq, nererusussuseqannginneq aattalimmik meriarneq timminnerlu, panertooriartorneq aamma oqilineq , tamanna pillugu tusagassiuutinut nalunaarummi allassimavoq.
Nappaat qimmit toqqutigajuttarpaat, inunnulli tunillaanneq ajorpoq.
Tunillaassuunnerup siaruaatsaaliornissaa aallartisarneqalerpoq
Parvovirusi tassaavoq nappaat tunillannartoq anarnit siaruaattarpoq. Nunarput tamakkerlugu qimmit qimuttut akiuussutissanik kapineqartarnissaat inatsisitigut piumasaqaataavoq.
- Nappaatip tunillaaneranut pissutaajukkartartoq qimmiaqqat akiuussuserneqarsimanngitsut qimminut allanut akuliullutik pisarneri, naalakkersuisoqarfiup tusagassiuutinut nalunaarummi allappaa.
Qimmiaqqat tunillatsissimasutut pasitsaanneqartut siulliit tassaapput sapaatip-akunnerini arfinilinniit qaammatinut arfinilinnut utoqqaassuseqartut.
Tasiilami oqartussat Kuummiunilu qimmilerisoq suleqatigalugit akiuussusersuineq tunillannartumillu siaruatsaaliuineq aallartisarneqartoq, naalakkersuisoqarfiup nalunaarutigaa.
Kalaallit Nunaanni Uumasunut Nakorsaqarfiup Inuussutissalerinermullu Oqartussaaffiup nappaatip Kuummiut avataannut siaruaassinnaanera ernumanartoqartinngilaat.
