Assit takukkit: Narsarsuarmiup Narsarsuaq quilertanartuliatut taasalereeraa
Narsarsuaq qanga uummarissorsuuvoq.
Timmisartoq mittoq. Inuit aqqusinikkut pingaarnikkut umiarsualiviup tungaanut ingerlaaqatigiittut. Inuit allamut ingerlaqqitsinnatik akunnittarfimmi ulikkaaqqasumiittut.
Timmisartullu tulliata tikinnginnerani nipaanneq eqqissisimanerlu.
Ullumikkulli eqqissisimaneq kisimiuvoq.
Nunaqarfimmiut timmisartoq 5 kilometerisut qutsitsigisumiit timmisoq tusaraangamikku aqqusinermut aninissartik ullumikkut nuannarisarpaat.
Timmisartummi nipaa tusaallugu Narsarsuup uummaarikkallarneranut eqqaanartittarpaat.
Naak mittarfimmut tikinnermi isaarissap matua matoqqallunilu paarnaaqqagaluartoq suli nakkutilliisoqarlunilu aserfallatsaaliuisoqartarpoq, soorlulusooq mittarfik suli atorneqartoq.
Qulimiguulik sapaatip akunneranut ataasiarluni taamaallaat tikittaraluartoq, AFIS-imik aqutsisoq timmisartunut nakkutilliivimmi ullaakkut arfineq pingasuniit sisamat tungaanut sulisarpoq.
Tikittarfik inoqanngilaq qulliilu qaminngallutik.
Spanskit takornarialeriffiutaat Tasermiut Teresa Vallésip ingerlataraa. Ukioq manna 40 procentimik takornariakinneruvoq, Narsarsuarmilu takornarialeriffiup ingerlaannarsinnaanera nalornissutigaa.
Amerikamiut sakkutooqarfigisimasaat, 1940-kkunni sanaaq suli kusanarluinnarpoq. Narsarsuup arlaleriarluni matuneqarnissaanik sioorasaarisoqartarneranut tamatigullu aniguisinneqartarsimaneranut uppernarsaataalluni.
Mittarfiulli matuneqarnerata kingorna nunaqarfiup uumassuseerutivinnissaa innuttaasut ernummatigaat.
Narsarsuaq ilisimatusartunit nunami gassimik kissatsikkiartortitsisumik timmissanillu nutaanik nunasisunik misissuiartortunit suli tikinneqartarpoq.
Taakku ilaasa Narsarsuup ineriartornera uppernarsarniarlugu ukiut 20-t sinnerlugit tikittuartarpaat. Nunaqarfimmik ilisimatusarnerminnillu qimatsinissartik ajornakusoortittarpaat aallaqqaataaniimmi aallartittariaqartaramik.
Klubbi nunaqarfimmi innuttaasunut qanga katerittarfiuvoq. Arfininngorneq billardernissamut periarfissaasarpoq nunarsuarmilu pisut immiaarartuutaa eqqartorneqarsinnaasarlutik.
Nipilersoqatigiit tusaamasat Kangilinnguanut ingerlaqqittussat taamani sakkutooqarfiugallarmat tamaani qanga nipilersortarput.
Klubbili maanna taamaallaat apersortittoqartillugu imaluunniit inuuissiortoqartillugu atorneqartarpoq.
Nunaqarfimmi pequtit amerlanersaat nunanut allanut nassiunneqareerput.
Soorlu assersuutigalugu Amerikamiut katersugaasiviata mittarfiup bussii qangarnitsat tankip eqqaani uninngaannartut tigorusuttorujussuugaat.
Akunnittarfik maanna matuneqareersoq pisataarulluinnarsimavoq. Pisattat ilai Kangerlussuarmut nuunneqarput, allat Narsamiipput ilaalu aamma eqqaavissuarmi ikuallanneqareerlutik.
Akunnittarfik arlalinnit pisiariumaneqartaraluarpoq. Akissuteqarfigineqarsimanngillalli.
Inuusuttut angerlarsimaffiat nunaqarfimmut nuunneqarpoq.
Sulilu talittarfimmi aalisartumik kiserliortumik naammattuuisoqarsinnaasarpoq.
Aqqusineq pingaarnerup naanissaata tungaanut ingerlaguit taamani Amerikamiut napparsimmavissuat tamaaniikkallarmat pujoorfiusimasoq kisiartaalluni napasoq aamma takusinnaavat.
Ole Guldager meeraagallarami napparsimmaviup sannakuinik qanga pinnguartarsimavoq, asbesti nunamiittoq taamani eqqarsaatigivallaartarsimanngilaa.
Ullumikkulli sivisuumik tamaaniinnissaq peqqinnartuusorinngilaa.
Suliassaqarfiit ataasiakkaat nunaqarfimmi suli nassaassaapput. Pilersuisoq suli ammasarpoq. Nunaqarfiullu peqqinnissaqarfiani suli sulisoqaaluppoq, politeeqarfilli matoqqavoq meeqqerivillu.
Narsarsuup siunissaa suli nalorninartumiippoq.
Naak innuttaasut 40-innaat kiserngorukkaluartut, mittarfiup ilaata sakkutooqarfimmit siunissami atorneqarnissaa oqallisigineqartarpoq. Danmarkimit Natomit imaluunnit Amerikamiunit atorneqassanersoq – innuttaasunit suli qulakkeerneqanngilaq.
Mittarfimmi suli matuneqavinngilaq.
Timmisartunilliuna tikittoqarneq ajortoq. Tamannalu Narsarsuup uummaarissuujunnaarneranik kinguneqarpoq.
Allaaserisaq apersorneqartut oqaluttuaat aallaavigalugit allaaserineqarpoq. Apersorneqartut tassaapput Ole Guldager, Finn Thomsen, Storch Lund, John Burfell Jensen, Teresa Vallés aamma Konkordia Sørensen Gabriel.
