Kuummiuni qimmiaqqat pingasut tuniluuttumik nappaateqarsorineqartut

Kalaallit Nunaanni Uumasunut Nakorsaqarnermut Inuussutissalerinermullu Oqartussaaffik, Kuummiuni qimmit tuniluussinnaasumik nappaateqarnerannik pasitsaassilluni allakkanik apriilip qulingiluaanni tigusaqartoq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiuutinut nalunaarummi allappoq.

Tuniluussinnaasumik nappaateqarsorineqartut qimmiaqqat marluk, pingasut arfinillillu akornanni qaammateqarput. Qimmiaqqat pingajuat sapaatit akunnerinik arfinilinnik utoqqaassuseqartoq aamma nappaateqarsorineqarpoq.

Nappaatilli suli suussusersineqanngillat parvoviruseqartoqarneratigulli aseruuttoortoqarsimanissaa pasitsaanneqartoq, naalakkersuisoqarfik allappoq.

Tunillaassuuterujussuarnissaa aarleqqutigineqartariaqanngitsoq

Kuummiuni qimmit akiuussutissamik kapiteqqammerput, Tasiilamilu oqartussanit Kuummiunilu kapuisartumit kapuinissamut maleruagassat sukaterneqarput.

- Nappaatinut qimminit pingasuneersunut tunngatillugu tunillaassuuterujussuarnissaa  aarleqqutigisariaqanngilaq, Kalaallit Nunaanni Uumasunut Nakorsaqarnermut Inuussutissalerinermullu Oqartussaaffik, tusagassiuutinut nalunaarummi allappoq.

Parvovirusimut qimmit nappaataannut tingukkullu aseruuttuunnginnissamut qimmit akiuussutissanik ukiuni pingasuni atuuttussanik kapoorneqartarput. Qimmiaqqalli suli akiuussuserneqarsimanngitsut tunillatsinnissamut ilimanaateqarnerusarput.

Qasoqqaneq, kissarneqalerneq neriumajunnaarneq aattalimmik meriarlunilu anarneq, imerusunneq oqilinerlu qimmit parvoviruseqalersimanerannut ersiutaasartut tusagassiuutinut nalunaarummi aamma allaqqavoq.

Qimmillu akiuussutissamik kapineqartarnissaat inatsisitigut piumasaqaataasoq qimmillu akiuussuserneqarsimanngippata pisariaqartoq, erseqqissaatigineqarpoq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiuutinut nalunaarummi allappoq.