Naleraq naalakkersuisunut isornartorsiuingaatsiartoq: Angerlarsimaffeqanngitsut nuutsiinnarneqarsinnaanngillat

Naleqqap Nuummi angerlarsimaffeqanngitsut arfineq marluk allamut inissinnissaannik innersuunneqaratik toqqi peeqquneqarmata naalakkersuisunut Kommuneqarfimmullu Sermersuumut isornartorsiuingaatsiarpoq.   

Suliaq pillugu KNR-ip allaaserisaanut qisuariaatitut tusagassiuutinut nalunaarummi allaqqavoq. 

Naleqqamit oqariartuutigineqartoq naapertorlugu oqartussat toqqinik piiaaginnarlutik angerlarsimaffeqanngitsuunermik aaqqiiunnanngillat. 

- Angerlarsimaffeqanngitsut nuutsillugit inuit takusinnaanngisaannut inissinniarneqarnerat ajornartorsiummut aaqqiinerunngilaq, partii allappoq.

Aalajangersimasumik aaqqiissuteqartoqarnissaa piumasarineqartoq

Kommuneqarfik Sermersuumit toqqit sisamat peeqquneqarput, pilersaarusiornermut inatsimmut unioqqutitsinerummata.

Taamaattorli Kommuneqarfik Sermersuumit naalakkersuisuniilluunniit taakku angerlarsimaffeqanngitsut arfineq marluk sumunnarsinnaanerinik paasissutissiisoqanngilaq. 

Tamanna Naleqqamit tupigineqaqaaq.

Partiimit oqaatigineqartoq naapertorlugu oqartussat ‘toqqissisimanartumik, inuppalaartumik ataqqinnittumillu allamik innersuussinatik toqqit peeqqusinnaanngilaat.   

- Pilersaarusiornermullu inatsit toqqammaviliullugu isumaginninnikkut politikki iluatsinngitsuugaq taarsiullugu Naalakkersuinikkut utoqqatsissutissarsiortoqaannarsinnaanngilaq, partii allappoq.

Inernerinik takusaqarusuttoq

Naleqqap angerlarsimaffeqanngitsuuneq inissaaleqinerlu Inatsisartuni oqallinnerni aamma § 37-mut apeqqummut ukiuni arlalinni qaqilertortarsimallugu oqaatigaa.

Partiip angerlarsimaffeqanngitsunik nuna tamakkerlugu kisitsineq 2022-meersoq, angerlarsimaffeqanngitsullu 491-it nalunaarsorneqarnerannik kinguneqartoq aamma naalakkersuisut angerlarsimaffeqanngitsuuneq pillugu periusissiaa “kikkut tamarmik pitsaasumik inuuneqarsinnaatitaapput” ilaatigut innersuussutigai.

Periusissiaq 13-inik suliniutitaqarpoq, misiliutaasumillu suliniut Housing First angerlarsimaffeqanngitsuunermit aalajangersimasumik angerlarsimaffeqalernissamut inissamik tapersiissuteqarnermik ilaqartoq alloriarnermi siulliuvoq.

Naleraq periusissiortoqarneranit ukiut pingasut qaangiuttut inerneranik takusaqarusuppoq.

Partiip periusissiami suliniummit qassit naammassineqarsimanersut, angerlarsimaffeqanngitsunit qanoq amerlatigisut initaarsimanersut aamma Housing Firstimik suliniut qanoq ingerlanersoq ilaatigut apeqquteqaatigaa.

Arlalinnik piumasaqaateqartoq

Naleqqap angerlarsimaffeqanngitsut arfineq-marluk inatsisitigut akuerisaasumik naleqquttumillu neqeroorfigineqartinnatik toqqinik piiaaqquneqassanngitsut maanna piumasaraa.

Partiip tamatuma saniatigut naalakkersuisut Kommuneqarfik Sermersoorlu pineqartut pillugit ataatsimoorlutik erngertumik aaqqiissuteqaqquai.

Naleraq angerlarsimaffeqannginneq pillugu periusissiap suliniutai 13-it aamma Housing Firstimik suliniutip killiffianik saqqummiusseqqusivoq. Nuna tamakkerlugu angerlarsimaffeqanngitsut takuneqarsinnaasut takuneqarsinnaanngitsullu nutaamik kisinneqartariaqarnerarpai, nunarput tamakkerlugu angerlarsimaffeqanngitsunut isumaginninnikkut tapersiinermi inissiat amerlanerusariaqarnerarpai kiisalu nuna tamakkerlugu iliuusissatut pilersaarut akisussaaffinnik, piffissaliussanik aningaasaliissutinillu aalajangersimasunik imalik suliarineqartariaqarnerarlugu.

Partiip tusagassiuutinut nalunaarutaa naalakkersuisut periusissianik timitaliinissaannik kaammattuuteqarnermik naggaserneqarpoq.

- Inuiaqatigiinni sanngiinnerpaat tammarnissaannik, toqqortiinnarlugit peqquneqassanngillat. Ikiorneqartariaqarput, ataqqineqartariaqarput, Naleraq allappoq.