Borgmesteri angerlarsimaffeqanngitsut pillugit apersorneqarusunngitsoq: Kommuni allakkamik nassiussisoq
Nuummi angerlarsimaffeqanngitsut arlallit tupertut, Nuup killeqarfiata avataanut 500 meterinik ungasissusilimmut Kommuneqarfik Sermersuumit aamma Aningaasaqarnermut Akileraartarnermullu naalakkersuisoqarfimmit nooqquneqartut KNR-ip sisamanngornermi saqqummiuppaa.
Toqqinik nappaanerat atuinerallu inatsisit tunngavigalugit aalajangersakkanut naapertuutinngitsoq, oqartussat marluullutik nalilersuutigaat.
Angerlarsimaffeqanngitsullu naammagittaalliuteqaramik ilalerneqanngillat.
Sumut nuunnissaannik imaluunniit susoqarnissaanik pilersaaruteqartinneqaratik politiinit peersitaanissartik maanna annilaanngatigaat.
KNR-ip borgmesteri Avaaraq Olsen (IA) tallimanngornermi ulloqeqqata siornatigut apersornissaa iluatsippaa. Kisianni taassuma apersorneqarnissani kissaatiginngilaa.
Suliaq inunnut ataasiakkaanut tunngasuummat massakkut apersuisoqarsinnaannginneranut kommunimit tunngavilersuutigineqarpoq.
KNR-ip apersuinissaminut suliat nalinginnaasut oqaloqatigiissutigineqarnissaat kissaatigigaluarpaa tassa inunnut ataasiakkaanut tunngassuteqanngitsut.
Kommuneqarfik Sermersoorli allakkatigut KNR-imut akissuteqarpoq.
- Suliaq inunnut amerlanngitsunut tunngasuummat apeqqutit inuit atugaannut sulianullu ataasiakkaanut tunngassuteqarsinnaapput, kommune allappoq.
- Paasissutissat taamaattut kommunimiit tamanut ammasumik oqaaseqarfigineqarsinnaanngillat kisianni suliap nalinginnaasumik ingerlarnga innuttaasunullu angerlarsimaffeqanngitsunut kommunimiit neqeroorutaasoq paasissutissiissutigineqarsinnaapput. Tamanna tunngavigaluguttaaq suliaq pillugu borgmesterip KNR-imi apersorneqarnissani taamaatippaa.
Borgmesterilu Doris Jakobsen Jensenimit Siumumeersumit isornartorsiorneqarpoq.
- Isumaqarpugut taanna oqaaseqarnaveersaarneq akuerineqarsinnaanngitsoq. Politikeriugaanni aamma oqaaseqarsinnaasariaqarpoq ataatsimut isigalugu taanna ajornartorsiut, inuit ataasiakkaat pinngikkaluarlugit.
Nuunneq imaluunniit politiinit peersitaaneq
Allakkami kommuni paasissutissiivoq, innuttaasunit naammagittaalliortoqarsimasoq suliamik aallartitsinermik kingunilimmik.
- Nunaminertaq tamanit atorneqarsinnaasoq pisarialimmik akuersissuteqanngitsumik atorneqartillugu kommune nunaminertanut oqartussaasutut qisuariartussaatitaavoq.
Tassani erseqqissarneqarpoq sumiiffiup atorneqarnissaa inatsimmut atuutsinneqartumut naapertuutinngitsoq, taamaammallu piaasoqartariaqartoq, soorlu KNR-imit aamma allaaserineqartoq.
- Inissisimaffia atorneqarneralu maleruagassanut atuuttunut eqquutsitsippat, najugaqarfinnit allanit qaninnerpaamik 500 meterinik ungasitsigitillugu tupermi unnuineq aallaaviatigut pisinnaasoq innuttaasunut pineqartunut ilisimatitsissutigineqarpoq, kommuni allappoq.
Angerlarsimaffeqanngitsut namminneq kajumissutsiminnik nuussimanngippata toqqit peerneqarnissaanut atatillugu politiit suliassaattut noqqaassutigineqarsinnaasoq, tamannalu kommunimiit ornigulluni pissaanerup atoqqusaannginneranik peqquteqartoq, kommunip erseqqissaatigaa.
Thue Noahsenilli allamut nuunnissamut peqqussut kommunip kinguartissimagaa pingasunngornermi ualikkut oqaatigaa, angerlarsimaffeqanngitsullu sumut nuunnissaat paasineqarpat aatsaat nuussinnaapput.
Kommunip suliassai makkuusut
Kommunimi aqqusinermi ujartuillutik angalaartartut Nuummi innuttaasut angerlarsimaffeqanngitsut ataasiakkaat akornanni killiffiat pisariaqartitaallu aallaavigalugit ikiuinissamik neqerooruteqarlutik, Kommuneqarfik Sermersooq allakkami naggasiutigalugu allappoq.
- Ilaatigut angerlarsimaffeqanngitsunut unnuiffimmiissinnaanermut, tapersersuinissamut aamma namminerisamik inigisassami najugaqarnissamut sungiusarnermut neqeroorutit isumaginninnikkulluunniit neqeroorutit allat pineqarput, kommuni allappoq.
Borgmesteri qanoq isumaqarnersoq kommunillu Nuummi angerlarsimaffeqanngitsunut ikiuiniarnermi neqeroorutai naammannersut KNR-ip borgmesterimut apeqqutiginiaraluarpai.
