Jeff Landry Nuummi isumasioqatigiinnissami peqataasussanut ilaasoq
USA-p Kalaallit Nunaannut immikkut aallartitaa Jeff Landry, pilersaarutit malillugit maajip 19-ianni nunatsinnut tikissaaq.
Taanna Nuummi isumasioqatigiinnissamut Future Greenlandimut peqataasussat akornanniippoq, tamanna Sermitsiap allaaseraa qaaqqusanullu allattorsimaffimmi aamma takuneqarsinnaavoq.
Future Greenland Sulisitsisunit (Grønlands Erhverv) aaqqissuunneqartarpoq. Sulisitsisulli pisortaat Christian Keldsen KNR-imut erseqqissaavoq, Jeff Landrymik nammineq qaaqqusisuunatik.
- Uagutsinnit qaaqquneqanngilaq, pisortatigoortumik pilersaarutini ilaanngilaq, uagutsinnullu attuumassuteqanngilaq, Christian Keldsen oqarpoq.
Jeff Landry Louisianami guvernøriuvoq, ukiullu aallartinnerani USA-p præsidentianit Donald Trumpimit Kalaallit Nunaannut immikkut aallartitatut toqqarneqarpoq.
Pisortatigoortumik qaaqquneqarsimanngitsoq
Future Greenlandimut bilitsinik kikkulluunniit pisiniarnissamut periarfissaqarsimasut, Christian Keldsen erseqqissaavoq.
Kalaallit Nunaanni inuussutissarsiornikkut ineriartortitsineq isumasioqatigiinnermi sammineqassaaq, nunanillu 20-neersut inuit 500-it sinnerlugit peqataasoqassangatinneqarput.
- Amerikamiut aallartitaqarfiat Future Greenlandimut nalinginnaasumik bilitsinik pisisimavoq, peqataasussallu aqqi aatsaat maanna nalunaarutigalugit, Christian Keldsen oqarpoq.
Jeff Landryp takkunnissaa naatsorsuutigaajuk?
- Takkunnissaanik nalunaarfigineqarpunga, peqataasussatullu allattorsimasut tamarmik takkunnissaat nalinginnaasumik naatsorsuutigisarpara, Christian Keldsen oqarpoq.
Inuussutissarsiortut aallartitaat peqatigalugit immaqa maajimi nunatsinnut tikissallutik, Jeff Landry ukiup aallartinnerani KNR-imut oqarpoq
Katuami Kulturip illorsuani maajip 19-ianniit 20-at ilanngullugu isumasioqatigiittoqassaaq.
